Juventus-in Muani an la lut

Serie A club Juventus chuan Randal Kolo Muani chu Paris Saint-Germain aṭangin euro maktaduai 50-in an la lut a, €38mtd an pe phawt ang - a khelh ṭhat dan a zirin €15.2mtd pek belh leh tur a ni.

Kum 27 mi Muani hi Juve-ah hian a mikhual hran lo. Kum 2023 khan PSG panin, 2024-25 season chawhnu lam kha Italian club-ah hian loan-in a khel - match 22 a khelhsakah goal 10 khungin, assist vawi thum a nei.

Juve-ah a kir leh ta a, kum nga chhung khel turin contract a ziak. Muani hian kum 2023 khan beiseina sang tak nen PSG a zawm a, French club a pan hma season-ah hian Eintracht Frankfurt tan league match 32-ah goal 15 khungin, assist vawi 14 a nei thei.

PSG hian a lakluh nan pawh €90mtd zet an seng a, an beisei ang erawhin a khel zui lo. French club tan match 54-ah goal 11 khungin, assist vawi sarih a nei a, thla liam ta 18 chhungin Juve leh Tottenham Hotspur-ah te loan-in a khel.

Spurs-ah hian season hmasa tluan kha loan-a khelin, inelna hrang hrangah match 41 a khelhsak a, goal nga khungin, assist vawi li a nei tel bawk.