Spurs-in Osimhen an duh

Roberto De Zerbi hoa indinthar hna thawk mek Tottenham Hotspur chuan, Galatasaray striker Victor Osimhen lak luh an duh a, Nigerian forward manah hian pound maktaduai 55 thehchhuah an inhuam a, mahse Turkish champion hian £65 mtd an phut niin khawthlang chanchinbuten an sawi.

Spurs hian striker goal khung thei tak tak an mamawh a, an neih sa Dominic Solanke chu goal hmaa a hriam loh bakah Richarlison-a hma lam hun a chiang lo a, hei vang hian De Zerbi-a'n striker thar a melh.

Kum 27 mi Osimhen hian season hman zawh takah khan Galatasaray tan inelna hrang hrangah match 52-ah goal 41 thunin assist 10 a nei a, top five league chhuahsan tawh mah se a thiam ngaiin a la thiam reng tih a lantir.

Tottenham leh Galatasaray te inkarah indawrna mumal erawh a la awm lo a, Turkish club-in an phut zat £65 mtd chu tunlai player man leh Osimhen-a theihna leh a kum zat ngaihtuahin a tam lo. Hei bakah hian Spurs hian tun nipuiah sum an ren loh avangin an lak theih mai a rinawm.

Hetihlai hian kum 47 mi De Zerbi chuan Richarlison chu la awm chhunzawm zel se a ti a, mahse amah berin a dinhmun a la tichiang lo. Brazilian forward hian kum khat daih chiah contract a nei tawh a, Italian coach-in chhuak duh an awm a nih chuan dan a tum loh thu a sawi bawk a hma hun a chiang lo hle.

Season hmasaah Spurs hian 17-na ni chungin season an khar a, Premier League-ah an inhamtang thei hram. An hmelma Arsenal an lo champion bawk avangin season tharah chuan chetsual nawn an tum tawh lo a, sum an ren lo hle.

An club chanchina player man ti ber ni turin Sandro Tonali chu Newcastle United aṭangin an la lut a, Italian midfielder manah hian £92.5 mtd an seng. West Ham aṭangin midfielder Mateus Fernandes chu £85 mtd in an lak bakah £52-in Jan Paul van Hecke chu Brighton aṭangin an la lut tawh bawk.

Anni bakah hian defender Andy Robertson leh Marcos Senesi bakah goalkeeper Martin Dúbravka te chu a thlawnin an lo la tawh bawk a, Italian coach De Zerbi hnaiah an ṭang takzet.