Bayern an inṭhuahfai dawn

German champion Bayern Munich board member Max Eberl chuan an player pathum - João Palhinha, Sacha Boey leh Bryan Zaragoza te an ruahmannaah an tel loh thu a sawi a, chhuah an phalsak thu a sawi.

Eberl chuan, "Heng player te hi kan chhuah zalen kan duh a ni. Ruahmanna thar kan siamah an tel tawh lo a, an awm chhunzawm a nih chuan an tan hmun chan a harsa tawh ang. Chutihrualin, Bayern-ah hian an training phalsak reng," a ti.

August thla chhungin bavarians hian an squad an zirchiang dawn a, player te dinhmuna zirin Champions League squad tur bakah player thar lak luh chungchangah thutlukna an siam dawn niin khawthlang chanchinbute chuan an ziak,

Player pathumte hi season hmasa khan loan-in club dangah an chhuak vek a, an khelhnaah Palhinha chauh hi rinawl a ni phâk. Potuguese midfielder hian Tottenham Hotspur tan inelna hrang hrangah match 33 a khel. Kum 31 mi Palhinha hian Bayern-ah tan hmun chang tura beih thlang mah se, chhuahtir an tum ta zawk.

Hetihlai hian French fullback Boey hian Galatasaray tan match 11 chiah a khel a, Spanish midfielder Zaragoza phei chuan AS Roma tan match li chiah a khel. An khelhna position-a khel thei an tam avangin an tan club thar zawn mai a finthlak ang.

Bayern hian vawiin tlai dar 4:30 hian South Korea-ah Jeju nen friendly match an khel dawn a, World Cup khel zingah Luis Díaz, Konrad Laimer, leh Josip Stanišic te chuan squad an zawm thei tawh dawn. Harry Kane, Dayot Upamecano leh Michael Olise te erawh August 8, Inrinni-ah chauh an lo kir ve thung dawn.