Vozinha-a'n Chile a pan ta

World Cup aṭanga lar chhuak Vozinha chu club pahnihin inchuh mah se, a be hmasatu Colo Colo a zawm dawn niin a lang ta. Cape Verde goalkeeper hian nimin khan Chile khawpui Santiago-a thleng a, mipui tam takin an hmuak

Kum 40 mi keeper hi Colo Colo chuan lak luh nghal theih an inrin avangin, Vozinha tih hriat takin an club instagran page-ah a hming leh hmel tilang si loin a thlalak an lo phochhuak hman tawh.

Mahse Morocco club RS Berkane an lo lan hnuah thil a danglam. Berkane coach Bubista hi Cape Verde lo enkawl tawhtu a ni a, a pu hlui aṭanga sawmna a hmuh bakah Colo Colo aia sum a hmuh hnem dawn vangin Vozinha-a'n Chile a pan leh duh lo nia sawi a tam.

Colo Colo fan te an thinrim hman hle a, club board-in fans ṭhenkhat thinrim chu hriain, boruak sosang tur tihdaih nan Vozinha chu permit fel loh vang chauha la la lut thei lo an nih thu an sawi a ngai hial.

Ngawi renga a awm hnuah nimin zing (anmahni huna Pathianni zan) khan Vozinha chuan Colo Colo inkulhna Santiago-ah a ṭum a, mipui tam takin airport-ah banner leh flag te kengin an lo hmuak a, club legend te an lawm dan ang hialin Vozinha an lo hmuak.

Vozinha chuan, "Heta ka awm thei hi ka hlim hle a ni. Ka lo thlen hma a fan ten dawhthei taka min lo nghah vangin lawmthu ka ka sawi bawk, Monumental Stadium-ah (Colo Colo stadium) kan inhmu thuai dawn nia," a ti.

Cape Verde goalkeeper hian medical test neih a la hmabak a, thla ruk daih contract a ziak dawn a, kum khat dang pawhsei theihna a awm dawn bawk. Tihfel ngai a zawh hunah, rinhlelhna nena an thlir Vozinha hi an tlangzarh thei tawh ang.

Football Federation of Chile (FFC) chuan Vozinha vang hian player ten an hming dik tak chauh, jersey hnungah chhut kai an phal ṭhin chu Vozinha hi a huam ve dawn lo. Vozinha hming dik chu Josimar José Évora Dias a ni a, mahse a larpui zawk hming hi a ha chhunzawm thei dawn.