CYMA Volleyball en man Rs 20

Central YMA leh Mizoram Volleyball Association buatsaih LBS Suzuki Avenis 24th Inter Branch YMA Volleyball Tournament 2026 chu nimin aṭangin R. Dengṭhuama Stadium, Mualpuiah khelh ṭan a ni a, vawiin hian a hmun ngaiah chhunzawm a ni dawn. A hmuna inkhel en man hi Rs 20 chauh a ni.

R. Dengṭhuama Stadium, Mualpuiah court pathum siam a ni a, court 1 leh 2-ah mipa inkhel awmin court 3-ah hmeichhia inkhel a awm thung. Ni khatah mipa inkhel 10 leh hmeichhe inkhel pathum a awm a ni. Inkhel hi MVA YouTube Channel (Court no. 1), Central YMA YouTube Channel (Court 2) leh HD Sports YouTube Channel (Court 3) aṭangin a thlawnin en theih.