Edin Dzeko a la inkhel zel dawn

Kum 40 mi ni tawh mah se, Edin Dzeko-a'n inkhelh chhunzawm zel a la tum a, Bundesliga khel tura a kaipui Schalke-ah season khat dang khel turin contract thar a ziak.

Bosnia and Herzegovina international Dzeko hian January khan Serie A club Fiorentina chhuahsanin, German second division club Schalke a zawm a, match 11-ah goal ruk khung sakin, Bundesliga khel turin a hruai kai.

Schalke-ah hian kum chanve atan chauh contract a ziak a, mahse, a khelh ṭhat em avangin German club hian kum khat dang atan an chelh - kum 41 a tlin thlengin top flight football a khel dawn tihna a ni.

Dzeko hi Germany-ah a mikhual lo. A hming chherna tak pawh VfL Wolfsburg niin, match 142-ah goal 85 ngawt a khungsak a, 2008-09 season khan Bundesliga nomawi a chawipui hial.

German club aṭang hian Manchester City zawmin, Premier League (2), FA Cup leh League Cup-ah te champion nomawi a chawipui hnuin, AS Roma, Inter Milan, Fenerbahce leh Fiorentina tan a khel leh a ni.

City tan match 189-ah goal 72 ngawt a khung a, Roma tan match 260-ah goal 119 ngawt khung mah se, nomawi chawipui a nei lo a, Inter tan match 101-ah goal 31 khungin, Coppa Italia (2) leh Supercoppa Italiana (2) te a lakpui a, Champions League final a hruai thleng bawk.

Fenerbahçe-ah pawh season hnih chhungin, match 99-ah goal 46 ngawt a la khung thei a, Fiorentina-ah match 18 aṭangin goal hnih chiah a khung thung - Schalke-ah kum 40 kai tawh chungin a vul thar leh mek.