Inter Miami-ah KDB kal dawn lo

Napoli midfielder Kevin De Bruyne chuan Major League Soccer club Inter Miami a pan dawn lo a, season tharah Napoli-ah a khelh chhunzawm dawn niin journalist rintlak Fabrizio Romano-a'n a tarlang.

Kum 35 mi De Bruyne hi season hmasa khan an coach Antonio Conte nen, an khelh dan hmangah an thu a inhmuh loh avangin a chhuak dawn nia sawi a tam hman hle. Mahse Conte zawkin Napoli a chhuahsan a, KDB a châm dawn nia rinna a lian.

Hetihlai hian tun hnaiah Belgian midfielder hi Lionel Messi khelhna Inter Miami-in lak luh an tum tih thawm a awm a, David Beckham-a club-ah hian Messi bakah Luis Suarez, Rodrigo De Paul leh Casemiro te an awm avangin Napoli fans-in a kal mai an hlau.

Mahse Fabrizio-a'n thu leng vel mai mai a nih thu a sawi a, hei bakah hian Manchester City midfielder hlui hian season khat khel turin contract a la nei a, kum khat dang pawh sei theih dan a la neih bawk avangin a chhuak dawn lo tih a nemngheh a ni.

Massimiliano Allegri-a'n Napoli hi tun season aṭangin a enkawl dawn a, KDB bakah Manchester United player hlui Romelu Lukaku leh Scott McTominay te nen Serie A title lak an tum dawn.

Chutihruain Lukaku zawk hi tun hnaiah USA aṭangin sawmna a dawng a, Atlanta United chuan nen sawizawm niin MLS khelh mai a hnial lo niin khawthlang chamnchinbute chuan an ziak bawk.