Lakers leh Thompson sawizawm

Los Angeles Lakers chuan player thar melhin Klay Thompson nen sawizawm an ni a, American shooting gurad hian Dallas Mavericks tan a contract zawhna tur a hman tawh avangin an la lut lo ang tih a sawi theih loh.

Kum 36 mi Thompson hian season 13 zet Golden State Warriors tan a khelh hnuah July 2024 khan Mavericks a zawm a, beiseina sang tak nen Mavs zawm mah se a kum a tam ve tawh bakah Warriors-a a khelh dan ang a pha tawh lo.

Mavericks hian tun dinhmunah regular season-a player neih theih zat (15) aia tam an kawl a, Thompson hi Mavs hotu lamin chhuiahtir dan kawng an dap lai a nih bawk avangin sawi zui a tam hle

Lakers te hian an thiampuipa LeBron James-a'n a chhuahsan tawh a, kumin nipui chhungin forward khel tur tam tak an lo melh tawh. Lakers-in an ngaihven zinga mi Jonathan Kuminga an chang lo a, Thompson bakah a teammate PJ Washington nen sawi zawm an ni mek

Mahse Dallas lam hian buyout aia trade hmanga chhuah tir an duh zawk avangin, Lakers-in an player an chhuahtir ve a ngai dawn a, hei vang hian indawrna mumal a la awm thei lo.

Thompson hian season hmasa khan Mavs tan match 69 aṭangin vawi riat chiah bul a ṭan a, match tinah 11.7 points nei ang chauh niin a khel ṭha tawk lo hle. Lakers-in lak luh tuma thapui an thawh chuan Thompson hi a chhuah mai a rinawm.

Hei bakah hian Thompson hi a naupan laiin Los Angeles-ah an khawsa ṭhin a, Mavs-ah a khelpui Luka Doncic a awm bawk avangin Lakers a zawm a nih chuan a mikhual lo ang.