Fabregas-a hnuaia khel tur Chalobah

Chelsea defender Trevoh Chalobah chuan Cesc Fabregas-a enkawl Como a zawm dawn ta a, English defender manah hian Serie A club hian pound maktaduai 30 an seng a, kum 2031 thleng châm turin contract a ziak dawn.

Kum 27 mi Chalobah hi season hmasa khan Blues tan inelna hrang hrangah match 47 a khel a, World Cup-ah pawh England tan a feh chhuak. Blues tan rinrawl ni mah se Stamford Bridge-ah a hlim lo a, club dang nen pawh sawi zawm a lo ni fo tawh.

Blues hian season liam ta khan manager pahnih Enzo Maresca leh Liam Rosenior te an hrawn hman a, 10-naah season an khar. Kumin aṭangin Xabi Alonso hoin indinthar leh an tum a, tlarhnung tihphui nan Crystal Palace aṭangin Maxence Lacroix an la tawh.

French defender bakah hian Levi Colwill, Wesley Fofana, Tosin Adarabioyo, Josh Acheampong, Benoit Badiashile, Aaron Anselmino, Axel Disasi leh Mamadou Sarr te an nei sa bawk.

Italian club ṭhangduang Como an lo lang a, Chalobah hmin turin hun an duh rei lo. Season hmasa khan rin phâk bakin Como an che ṭha, palina niin season thara Champions League khel turin an inpetkai.

Como hian Chalobah man atan £25.7mtd an thehchhuak phawt a, a khelh ṭhat dan a zirin £5.1mtd an pek belh leh dawn. English defender hian UCL bakah World Cup thlenga tawnhriat a neih tawh avangin Fabregas-a hnuaiah hmun pawimawh a chan a rinawm

Hetihlai hian Chelsea erawh inṭhuahfai an la tum zel a, an defender Disasi, Badiashile, Sarr leh Acheampong te chu loan emaw a ngheta chhuah tir an tum mek. London club defender te hi Premier League club ṭhenkhatin an ngaihven hle.