Forest-in Reijnders an duh

Nottingham Forest chuan Manchester City midfielder Tijjani Reijnders chu nipui transfer laia lak ngei an tum a, Forest hian Dutch midfielder manah hian pound maktaduai 55 thehchhuah an inhuam.

Kum 28 mi Reijnders hian nikum June thla khan City hi £46.5 mtd in a zawm a, Pep Guardiola hnuaiah hmun pawimawh a chang nghal. Inelna hrang hrangah match 42 khelin goal ruk leh assist paruk a nei a, FA Cup leh League Cup nomawi a lakpui.

World Cup khelh zawh takah pawh khan Netherlands tan midfield luah lumtu a ni a, match thum khelin assist pakhat a nei. Mahse an ram hi round of 32 bak a thlenpui zo lo thung.

Transfer bazar-ah City hian Forest midfielder Elliot Anderson chu £116mtd in an lo la lut tawh a, World Cup khelh zawh taka Morocco tana khel ṭha tak Ayoub Bouaddi chu lak luh tumin an dawr mek. Kum 18 mi midfielder pawh hi a man a tlawm dawn lo.

Hetiang karah hian Reijnders dinhmun a nghing nia sawi a tam a, Forest lo lang nghalin Netherlands international hi an midfield tichak turin an manager thar Oliver Glasner-a'n a duh.

Kumin nipui bazar tir lam khan Atletico Madrid pawhin Reijnders hi an lo dawr tawh a, mahse City hian a man atana an chhiar zat £60mtd an ngam loh avangin an dawr chhunzawm lo.

City hian khawih World Cup golden ball dawngtu Rodri bakah Mateo Kovacic an la kawl a, Bouaddi-a'n a zawm leh a nih chuan Reijnders hi a chhuak a nih pawhin a mak lo ang.