Sancho-a'n Non League club-ah training nei

English forward Jadon Sancho chuan non-league club Flixton-ah training a nei mek a, Flixton hi England football inelna sang ber Premier League aṭanga chhiara division 10-naah an awm.

Kum 26 mi Sancho training neihna hmun hi United training-na hmun, Carrington aṭangin km thum bawr vel chauh a ni a, 1995 khan Man United coach ropui Sir Alex Ferguson-a'n a hawng nghe nghe.

Dortmund winger hlui hi Manchester United-a a contract a zawh tawh avangin free agent a ni a, a duhna lam apiangah a kal thei. Theihna sang tak nei mah se beisei a phâk loh avang leh hlawh a phut san avangin dawrtu a nei mai lo.

Kum 2021 khan Sancho hian Borussia Dortmund aṭangin pound maktaduai 73 zetin United a zawm a, a chhuahsan hnu thleng hian match 83 khelin goal 12 chauh a khung hman. A club hlui Dortmund bakah, Chelsea leh Aston Villa-ah te loan-in chhuak mah se ngai a awh leh tawh lo a, tunah club nei loin a awm mek.

Mahse tun hnaiah Europe club ṭhenkhat bakah Saudi Arabia lam aṭangin sawmna a hmu niin khawthlang chanchinbute chuan an ziak a, Sancho dawrtute erawh tarlan an la ni lo thung.