Serena leh Venus te inkawp dawn

Cincinnati Open-a doubles khel turin Serena leh Venus Williams te wildcard pek an ni. July thlaa neih Wimbledon-ah pawh khan Williams-te unau hi inkawp tur an ni a, amaherawhchu kum 44 mi Serena hi a khup a tihhliam avangin an khel dun thei ta lo.

WTA 1000 event hi August 11-23, 2026 hian Ohio-ah khelh ṭan tur a ni a, 2022 US Open hnua Serena leh Venus te an inkawp leh hmasak ber tur a ni. Serena hian kum li liam ta khan US Open a khel a, hei hi kumin Wimbledon-a a inlan hmaa Grand Slam-a a inlan hnuhnun ber a ni.

Cincinnati Open-a chet ṭhat hi Serena tan US Open khelh theihna kawng sialtu a ni thei dawn a, Grand Slam-a champion ngun ber record nihrual turin vawi khat nomawi chawi a la mamawh. Grand Slam singles-ah Margaret Court leh Novak Djokovic ten vawi 24 an champion a, record chelhtu an ni mek.

Williams-te unau inkawp hian major titles 14 an la tawh a, Olympic gold medal pathum an la tawh bawk. Kum 46 mi Venus hi Cincinnati Open-ah hian singles-ah a tel bawk ang.