Newcastle manager thar Jaissle

Premier League club hlun Newcastle United chuan manager thar atan Al Ahli enkawl mektu Matthias Jaissle an la lut. German manager hian kum li daih contract a ziah bakah Newcastle-in Saudi club hnenah pound maktaduai kua leh a chanve an pe bawk.

Eddie Howe thlaktu

July thla tawp khan Magpies hi an coach Eddie Howe chuan a chhuahsan a, kum 48 mi Howe chhuah chhan hi club-in transfer an kalpui danah a lungawi tawk lo nia sawi a awm. Mahse English coach chuan football aṭanga chawlh hahdam rih a duh thu chauh a sawi a, kum li leh a chanve hnuah Newcastle nen an inṭhen.

Howe a chhuah rualin Newcastle hotuten manager thar tur an melh nghal a, Jaissle-a hming a ri ring ta ber. Kum 38 mi Jaissle hi club enkawl lamah tawnhriat a la ngah lo a, mahse a team enkawl tawh ho a chet chhiatpui ngai lo a, hei hi Magpies-in an duh chhan niin a lang.

Tu nge Jaissle?

German manager hian 3 April, 2017 khan hi Danish Superliga club Brøndby manager Alexander Zorniger-a assistant coach ni turin ruat a ni a, kum hnih thawk hmanin June, 2019 khan Brondby hi a chhuahsan. Rei lote hnuah Austrian club Red Bull Salzburg chuan U-18 team manager atan an la zui.

Kum 2021 a lo inherchhuah chuan Jaissle-a tan hun duhawm a inher chhuak a, Austrian second division team, Liefering chuan an head coach thar atan la lut. Head coach anga a hna hmasa berah hian Liefering hi league-ah pahnihna a nihpui a, an club chanchina pahnihna an nih vawi hnihna chiah a ni.

Hemi kum vek April thlaah a lo awm tawhna Salzburg chuan Jesse Marsch thlak turin an ruai a, a season hmasa berah league title a lakpui bakah Austrian Cup-ah a champion pui bawk a, an club chanchina a vawi khatna atan Champions League-ah round of 16 a luhpui bawk.

A chet ṭhat nghal avangin a contract chu June 2025 thleng a pawtsei a, a season hnihnaah league title dang lakpui lehin, Champions League group stage-a pathumna an nih hnuah Europa League knockout round playoffs a thlenpui bawk.

Salzburg-a a record a ṭhat avang hian Al Ahli aṭangin sawmna a hmu a, hlawh pek san an inhuam avangin Saudi lam a pan. Jaissle hian kum thum chhung Al Ahli a enkawl chhungin AFC Champions League Elite-ah vawi hnih a champion pui a, Saudi Super Cup vawi khat a lakpui bawk a, Roberto Firmino, Riyad Mahrez, and Édouard Mendy te kawl mah se league-ah erawh a champion pui zo lo thung.

A phur

Al Ahli manager hlui chuan, "Europe-a club lian berte zinga mi ka enkawl thei tur hi inchhuanna tham a ni. Inlungrualna, tumruhna, taimakna leh nitina hmasawn duhna thinlung nen hna ka thawk dawn.

He team hian sang tak thleng thei turin theihna ropui tak an neiin ka hria a, Newcastle-ah hian hlawhtlinna tam tak chang thei turin ka theihna zawng zawng ka hlan dawn.

Premier League hi Europe-a league ropui ber pawl leh dangdai ber a ni a, a danglam bikna ka tem ve thei tur hi a hlimawm dawn hlein ka hria. Chutihrualin season ṭan nan kar thum vel kan la nei a, hemi chhung hian a ṭha thei ang bera insiamrem hman kan tum avangin hun khawhral hman kan ni lo," a ti.

A hmabak

Newcastle hi season hmasa khan 12-na ni chungin season an khar a, beisei an phâk lo hle. Tun season-ah Jaissle hoin ṭan an la thar leh dawn a, UCL khelh phâk an tum ngam ang.

Chutihrualin August 23, Pathianni zanah season thara an match hmasa berah Liverpool nen an inhmachhawn dawn. Hei bakah hian August 29, Inrinni zanah sum hmang na tak Tottenham Hotspur nen an inkhelh leh nghal dawn avangin Jaissle-a tan a awlsam dawn lo.

Newcastle hian tun nipuiah an player pawimawh Sandro Tonali, Anthony Godron leh Bruno Guimaraes te an chân tawh a, hei bakah hian Kieran Trippier, Matt Targett, Emil Krafth leh Joh Ruddy te chu an contract a zawh tawh avangin club an chhuahsan tawh bawk.

Player chhuak an awm rualin player panga -Bazoumana Touré (winger), Sean Steur (midfielder), Aladji Bamba (midfielder), Lukáš Horníček leh Ewen Jaouen (keeper) te an la lut ve tawh bawk a, £140 mtd an hmang tling tawh.

Magpies hi Spain-ah pre season hmangin an awm mek a, August 8, Inrinni zan dar 12:30-ah Valencia nen an inhmachhawn dawn. Jaissle tan Valencia hi a team enkawlna hmasa ber tur a ni ang.