Palace-ah Tomiyasu a lut ta

Crystal Palace chuan Japanese defender Takehiro Tomiyasu chu a thlawnin an la lut a, medical test pawh nei tawhin contract ziah chiah a hmabak tawh niin journalist rintlak Fabrizio Romano chuan a tarlang.

Kum 27 mi Tomiyasu hlui hi Palace coach thar Pierre Sage-a hnuaiah July 28 leh July 31 inkar a pre season tournament, Como Cup-ah khan squad-ah a lo awm tawh a, mahse a inlan lo thung.

Arsenal defender hlui hi Ajax-a a contract a tawp tawh avangin a duhna lam a hawi thei a, World Cup-ah Samurai Blue tan a chet ṭhat avangin duhtu a ngah a, an zingah Palace an langsar ta ber.

Eagles hi an defender pawimawh Maxence Lacroix-a'n Chelsea a zawmsan a, Nathaniel Clyne a chhuah bawk avangin tlarhnung thuamchakna tur an melh nghal. Tomiyasu hi tlarhnung khawiah pawh a khel theih avangin an iai lo.

Zanin dar 10:30-ah Eagles hian Premier League club tho Fulham nen friendly match an khel dawn a, Tomiyasu hian bul a ṭan kher lo a nih pawhin a inkhelh ve tawh a rinawm.