PSG dilna Ajax-in an hnawl

Ajax chuan Paris Saint Germain-in an winger Mika Godts an dilna euro maktaduai 40 chu an hnawl a, PSG-in an dawrna zat hi Dutch club hian tlem an tiin €60 mtd tal an phut.

Kum 21 mi Godts hi a che ṭha a, Eredivisie-ah match 34 aṭangin goal 17 a khung a, assist 13 a nei bawk. Belgium coach Rudi Garcia-a'n World Cup khel tura a koh ve loh avangin fans sawiselna pawh a tam hman hle.

Belgian winger thiamna hi Luis Enrique-a'n a hmuh hmaih lo a, hmatawng nei ṭha viau mah se French forward Bradley Barcola chu Liverpool nen sawi zawm reng an nih avangin Godts hi lak luh a duh.

Godts hian Ajax-ah June 2029 thleng châm turin contract a la nei a, mahse Dutch club hian July thla tawp khan German forward Julian Brandt chu free transfer-in an lo la lut tawh a, man to taka Godts an dawr a nih chuan an chhuahtir hreh tawh lo ang.

Champions League champion lai hian Godts bakah hian Japanese goalkeeper Zion Suzuki leh Spanish forward Ferran Torres te an hel ve reng a, Suzuki hi a man chungchangah Parma nen an la inrem thei lo.

Hetihlai hian Nilaini zan khan Spanish club Mallorca chu 3-0 ngawtin an hneh lo a, friendly match ni mah se Enrique-a tan result lawmawm a ni lo. Naktuk zan dar 8:30-ah Ullevi Stadium, Sweden-ah Manchester United nen an inhmachhawn leh dawn a, PSG hian chak ngei an tum tawh ang.