Atletico-in Romero an dawr

Atletico Madrid chuan Tottenham Hotspur defender Cristian Romero chu la lut turin dilna an thehlut a, Atletico hian Argentine defender manah hian pound maktaduai euro maktaduai 40 sen an huam niin Fabrizio Romano an tarlang.

Season hmasa Premier League-ah Spurs an che chhe takzet a, hetiang karah hian kum 28 mi Romero hi a hlim loh avangin chhuah a duh nia sawi a tam hle. Romero-a'n duhtu a ngah a, Atletico bakah Barcelona, Manchester United leh Inter Milan te nen pawh sawi zawm a ni.

Thu leng vel karah Romero a ngawi reng a, World Cup-ah an ram chu a zawna final luhpuiin Spain lakah a vanduai zawkah an ṭang thung. Season hmang chhe mah se World Cup-a a khelh dan enin a la tlahniam lo tih a lang.

Hei bakah hian tun nipui transfer-ah Spurs hian centre back pahnih Marcos Senesi leh Jan Paul van Hecke te an la lut a, Romero a chhuak a nih pawhin an buai phah lutuk dawn lo.

Inter pawhin Atalanta defender hlui manah €40 mtd an inhuam a, mahse Atletico hi Matteo Ruggeri leh Nahuel Molina te an hralh dawn a, an hralhna aṭanga an sum hmuh chu Romero man atana pek belh emaw a hlawh tihsan nan an hmang dawn niin khawthlang chanchinbute chuan an ziak.

Romero leh Spurs hian thuchhuah an la nei lo mah se Madrid club-ah hian, Romero hna pui Thiago Almada, Giuliano Simeone, Juan Musso leh Nicolas Gonzalez te an awm a, an coach Diego Simeone hi Argentine a nih bawk avangin a chhuak a nih pawhin a mak lo ang.