Premier League awp tumin Betis hneh lo

Premier League champion Arsenal chuan Nilaini zan khan Aviva Stadium, Dublin-ah Real Betis an hmachhawn a, 3-1 in an mualpho. Spanish club tan Rodrigo Riquelme, Nelson Deossa leh Pablo Fornals ten goal an khung a, Gunners tana Piero Hincapie khung chu scoreline timawitu chauh a ni.

North London club hian Premier League awp an tum bakah Europe thlengin ram zauh an tum a, transfer-ah pawh an thawm a lian. Brazilian midfielder Bruno Guimaraes an lakluh hnuah Vinicius Jr an la sawi ri a, mah se Spanish club vantlang Betis lakah an tlawm.

Gunners ngamtu Betis

Dublin-ah Arsenal-in bul ṭan ṭha mah se Kai Havertz-a ball fing chu Viktor Gyökeres-a'n goal-ah a chantir thei lo. David Raya a la inlan lo a, Kepa Arrizabalaga-a'n bul ṭanin Chelsea keeper hlui hian corner kick a chhut sual a, minute kuana lekah Rodrigo Riquelme-a'n a khung.

Betis lam bawkin goal an khung a, yard 26 vel aṭangin Nelson Deossa-a'n kawh zetin minute 26-naah a pet lut. Gunners lamin an ṭhatna set piece hmang ṭangkaiin player thar Christos Tzolis corner pet chu Hincapie-a'n minute 32-naah a tauh lut.

Mahse, goal hmaah Betis an hlauhawm zawk a, Spanish club hian chance ṭha an hlah hnuah minute 43-naah Pablo Fornals hmangin an khung. Kum 30 mi Fornals hian box pawn aṭangin goal kilah tak a khung. Second half-ah Arsenal-in player 14 ngawt an thlak a, 3-1 in an chak lo.

Player an thinur

Arsenal manager Mikel Arteta chuan, "Player-te an lungawi lo a, an tan hun harsa a ni. An khelh dan avangin an thinrim a, mah se hei hi a ṭha. Kan mamawh tak a ni," tiin player-te thinur thu a sawi.

English club hian Champions League final-a PSG an hneh loh hnuah August 1, Inrinni khan Girona nen friendly match an khel a, 4-1 in an chak. World Cup-ah Gunners player-te an che ṭha a, friendly match bul ṭan dan a fuh bawk avangin ngaih ṭha takin awm mah se kawng awlsamin a hmuak reng bik lo.

Chutihrualin Arsenal chak lohna hi friendly match tih hriat a ṭha a, season thar atana inpuahchahna a nih miau avangin chak hi an thupui ber a ni lo. Arteta chuan, "Chak chu a pawimawh a, kan chak loh avangin pawi kan ti. First half-ah player hman ngun zawkte an lut a, second half-ah kan thlak danglam. Player 25 ngawt kan hmang tih hriat a ṭha a, a chang hi chuan insiam ṭha tur chuan chak loh hi a ṭul ve ṭhin," tiin a êng zawngin a thlir.

Arsenal hian August 9, Pathianni zan dar 6:30 hian Borussia Dortmund an hmachhawn dawn a; August 12, Nilaini zan dar 12:00-ah Como nen friendly match an khel leh ang. Premier League champion an nih miau avangin August 16, Pathianni zan dar 7:30 hian FA Cup champion Manchester City nen Millennium Stadium, Cardiff-ah an inkhel ang.