Liverpool-in Jurgen Klopp an thlawp

Jurgen Klopp-a'n huaisen takin FA Cup fourth round replay chu first team-in an khelh loh tur thu a sawi a, German coach thutlukna hi Reds thuneitute pawhin an thlawp niin an sawi. 

Liverpool hian FA Cup fourth round-ah Shrewsbury chu 2-2 in an inhnehtawkpui a, hei vang hian relay khelh a ngai dawn. February 4 zanah Reds hi League One club nen replay khel tura tih an ni. Mahse, Jurgen Klopp chuan inkhel tura an tih hun hi thlasik chawlh neih hun tur a nih avangin a senior player-te khelhtir a tum lo a, Under 23 coach Neil Critchley hoin reserve team an inlan ang. 

Klopp chuan, "Premier League-in thlasik chawlh hi zah turin min ngen a, min ngen ang takin thutlukna kan siam a, kan chawlh tur thu player-te kan hrilh. "Mahse, FA lamin kan chawlh hi min zahsak thei lo a nih chuan tih theih kan nei lo a, Neil Critchley hoin senior player lo zawng an inlan a ngai dawn a ni," a ti. 

Klopp-a thutlukna hian nasa takin sawisel a hlawh a, FA thupuangtu pawhin Premier League club-te chuan tun season ṭan hma khan FA Cup fourth round replay neih hun tur hi an pawm vek thu a sawi. English football expert leh journalist tam zawkin Klopp an sawisel a, "Shrewsbury zah lohna a ni," an ti a, senior player-te chawlhtir mah se amah talin a team hi a ho an beisei thu an sawi. 

Premier League hmahruaitu Liverpool boss Jurgen Klopp erawhin a ngaihdan a thlak a rinawm lo a, Club World Cup an khelh avangin December khan League Cup-ah Under 23 coach leh player an lo inlan tir tawh bawk. 

Liverpool hian zanin dar 1:15-ah West Ham lenchilhin league match an khel dawn a, Inrinni zanah Southampton an mikhual zui dawn avangin an fixture a hautak hle. Premier League-a thlasik chawlh hi vawi khat hmanna tur a ni a, February 8-ah match nga khelh a ni ang a, February 15-ah match nga khelh leh tur a ni dawn bawk a ni.