Real Madrid tan lunghlu Diomande

Real Madrid chuan Ivory Coast international Yan Diomande chu RB Leipzig aṭangin an la lut ta nge nge a, a man atan euro maktaduai 140 ngawt an theh chhuak - African player man to ber record a siam nghal.

Kum 19 mi winger hian Real Madrid-ah hian kum sarih khel turin contract a ziak a, a man hi vawi khata pek tlak nghal tur a ni lo. Real hian €125mtd an pe phawt ang a, a khelh ṭhat dan a zirin €15mtd an pek belh leh ang.

Madrid khaw club hian €140mtd hi an pe tla a nih chuan Diomande hi khawvela player man to palina a ni dawn tihna a ni bawk. Paris St-Germain-in €222mtd-a Neymar an lei kha khawvel record a la ni reng a, PSG vekin Kylian Mbappe an leina leh Liverpool-in striker Alexander Isak an lakluhnate chuan a dawt.

A tawpah chuan...

Diomande hi tun nipui transfer-a player thawm nei na ber pawl a ni hial ang. Liverpool-in an dawr hmasa ber a, mahse, June thlaa pound maktaduai 69-a an dawrna chu hnar a ni a, PSG an lo lang ve zui.

Mahse, PSG pawh hi £102.5mtd-a an dawrna hnar a nih hnuah an inhnukdawk zui a, player-te chu an phu tawk aia to leh hlawh tama lakluh an tum loh thu an puang zui a, France club hian an tihdan hlui an sim tawh!

Diomande hi thla hmasa khan Real hian an inrempui tawh ang hialin media ṭhenkhat chuan an tarlang hman a, mahse, a ni lo. RB Leipzig-in tlawm taka chhuahtir an tum lo a, a tawpah chuan Real-in an duh thlu ngang bawk si a, €140mtd (£120mtd) in an chang ta.

Duhaisam

Real Madrid forward thar Diomande chuan, "Real Madrid ka zawm thei hi ka tan chuan duhthusam thleng dik a ni," a ti a, Ivorian forward chuan a naupan lai aṭangin Real tana khelh chu a lo suangtuah ṭhin thu a sawi.

Diomane chuan a club RB Leipzig hnenah lawmthu sawi zuiin, "RB Leipzig-ah contract ka la nei tih ka hria a, chuti chunga ka duhthusamte a thlen theih nana hma min laksaktu Leipzig thuneitute chungah lawmthu ka sawi a ni," a ti.

Kum 19 mi Diomande chuan Leipzig ṭantute hnenah lawmthu sawi zuiin, "Min thlawp ṭhin avangin in chungah lawmthu ka sawi a ni. Champions League-ah kan la intawng leh mai thei asin, tu nge hria?" a ti a, a club hlui a thlah.

Sulhnu chu

Kum 19 mi chauh a la nih avangin Diomande hian sulhnu sawi tur a nei tam lo. Spanish club Leganes aṭanga a professional zinkawng zawh ṭanin, kum khat chauh a khel hman tihah, nikum khan Leipzig hian an lei.

Leipzig-a a season hmasa berah match 36 khelin, goal 13 a khung bakah, assist vawi kua a nei a, Ivory Coast tan match 14 inlan tawhin, goal thum a khung der tawh bawk.

Season hman zawh takah Bundesliga Rookie of the Season-ah thlan a ni a, a beisei aiin a kal chak hial ang - tunah chuan Real Madrid tan a khel dawn ta a, a man a tam bawk a, pressure a na dawn!

Real an ṭha

Season hman zawh takah Real-in eng nomawi mah an chawi lo a, an inhmeh lo - coach atan Jose Mourinho an ko kir a, transfer bazar lamah pawh an che na hle. Diomande hi an player lakluh parukna chiah a ni.

Real hian tun nipui transfer-ah Bernardo Silva, Ibrahima Konate, Denzel Dumfries, Marc Cucurella, Carlos Espi leh Diomande an la lut ta a, Vinicius Jr chu contract thar an ziahpui ta bawk.

Madrid khaw club hian player lei belh tawh miah lo pawh ni se, champion tur khawpin an ṭha tawk tawh tih a chiang a, season thar La Liga leh Champions League a nghahhlelhawm leh ta sawt.