City-in Rodri lei tum Barca an hnar

Barcelona chuan Manchester City aṭanga Rodri lei tumin English club hi dawr mah se, City chuan an player lei tum Spanish club hi an lo hnar a, an dawrna zat pound maktaduai 38.5 chu City tan a tlem hret.

Kum 30 mi Rodri hian City-ah kum khat chauh contract a nei tawh a, a kum a tam ve tawh bawk avangin Barca dawrna zat hi a awm viauin a sawi theih. Mahse, City-in man tlawm taka kaltir an tum lo a, £60mtd tala hralh an tum.

Rodri hi a tirah tak chuan Real Madrid zawm tura ngaih vek a ni tawh. Mahse, Barcelona an lo lang a, Manchester City midfielder hian Catalan club lam a awn leh ta zawk niin a lang.

Real hian World Cup zawh aṭang khan, Rodri hi lakluh ngei tumin an lo ngaihven tawh a, club president Florentino Perez leh chief executive Jose Angel Sanchez te thlengin an inrawlh niin an sawi.

Mahse, a tawpah chuan Rodri-a'n Barca zawk a thlang a, a thutlukna hi Real thuneitute a hrilh tawh - a bik takin coach Jose Mourinho chu a lungawi lo viau nia sawi a ni a, an elpui club laka Rodri an chân hi a la na hle.

Manchester City chuan Rodri hi chelh duh mah se, kum khat chauh contract a nei tawh a, chona thar hmachhawn a duh bawk avangin chelh ai chuan man to taka hralh theih laia hralh mai hi an pawi ti lo.

City hian World Cup Best Player hi an hralh a nih chuan a hmun ruak luah turin Lille midfielder Ayyoub Bouaddi an beisei. Mahse, French club hian £86mtd an chhiar nia sawi a ni a, kum 18 mi midfielder man atana heti zat sen hi City tan a harsa mai thei.