Bruno chungchangah ka inrawlh lo - Jaissle

Newcastle United manager thar Matthias Jaissle chuan St James Park a zawm meuh chuan Bruno Guimaraes hmalam hun atana thutlukna siam fel a nih tawh thu a sawi. Magpies captain Bruno G hian pound maktaduai 75-in Premier League champion lai Arsenal a zawm.

Kum 38 mi Jaissle chuan, "Kan inhmu a, kan inbiak meuh hi chuan thutlukna siam a ni tawh. Inbiakna ṭha tak a ni a, player ṭha tak a nih bakah pa fel tak a ni. Bruno pawhin chona thar a mamawh a, a tel loa khawsak kan zir a ṭul. Kan player kawlte chungah rinna kan nghah a ngai a, thlak danglam deuh erawh a awm ang," tiin a sawi.

Tunkar tir khan Spain-a an training-na hmunah Jaissle leh Guimaraes te hi an inbia a, thutlukna engkim siam tawh a nih avangin an inbiakna hi chu inthlahna hun a ni ber tawh zawk.

Newcastle hian kumin nipuiah ringawt Anthony Gordon leh Sandro Tonali te chu Barcelona leh Tottenham lakah an chan tawh a, nikum nipui khan Alexander Isak-a'n Liverpool a zawm bawk. Kum khat chhung lekin Magpies-in an player pawimawh pali an chan a, manager Eddie Howe-a'n St James Park a chhuahsan pawh hi a mak lo.

German manager Jaissle chuan, "Club chhungah inthlak danglamna a thleng nasa a, player langsar chauh ni loin club legend te pawh an chhuak. Mahse, a ṭha lama kan thlir ve a ṭul. Chhuanlam siam lo a, kan tih theih chin kan tih ve a ngai a ni," tiin a sawi.

Magpies hian goalkeeper Lukas Hornicek leh Ewen Jaouen, midfielder pahnih Aladji Bamba leh Sean Steur bakah winger Bazoumana te lalutin pound maktaduai 146 an seng tawh. An player lakluhte hi an chhuahtirte thlirin an tenau deuh.

Hei chauh hi a ni lo a, manager chhuak ta Howe aiin Jaissle hi a hraw zawk chuang lo. Chutihrualin Jaissle hian Red Bull Salzburg chu Austrian Bundesliga-ah vawi hnih champion pui tawhin Austrian Cup a chawi tawh bawk. Saudi Pro League club Al Ahli pawh AFC Champions League Elite-ah ṭum hnih champion puiin Saudi Super Cup-ah a champion pui a, German manager hian sulhnu a nei chhe lo.