Hmeichhe volleyball-a record nei ṭha ber Bungkawn

Central YMA leh Mizoram Volleyball Association buatsaih Inter Branch YMA Volley Tournament hi hmeichhe tan bik vawi 22 buatsaih a ni tawh a, record nei ṭha ber chu Bungkawn an ni a, vawi riat an champion. Tun hnai inelna hnuhnung pathumah Bungkawn an champion vek a, kum 2022 khan Kanan record vawi sarih champion an nihrual hnuin kum 2024 khan record thar an siam.

Inelna hnuhnung berah khan Bungkawn hian Melody Lallawmkimi captain-na hnuaiah nomawi an chawi a, record chelhtu ni tur hian semifinal-ah Kanan chu 3-2 in an lehthal. Kanan hi chak zawk se chuan record an huhim thei dawn a, mah se Bungkawn lakah an tlawm ta zawk. Bungkawn innghahna F. Lalparmawii chu best spiker a ni a, captain Melody chu best setter a ni thung.

Bungkawn hian tum hma hian a zawnin vawi thum a champion tawh a, chutihrualin hmeichhe inelnaah hian vawi li champion zawn an la awm lo. Kumina an champion leh thei a nih chuan record thar an siam leh thei dawn.

Bungkawn leh Kanan hnaih bertu chu vawi thum champion tawh Dawrpui Vengthar an ni a, Champhai leh Electric Veng te vawi hnih ve ve an champion tawh bawk. Hmeichhe inelnaah hian Bungkawn (8), Kanan (7), Dawrpui Vengthar (3), Champhai (2) leh Electric Veng (2) te chauh an la champion.