English keeper man to ber Trafford

Leeds United chuan Manchester City aṭangin goalkeeper James Trafford chu pound maktaduai 45-in an la lut a, kum nga châm turin contract a ziak. Kum 2017-a Everton-in Sunderland aṭanga Jordan Pickford an lakna £30mtd chu khumin English keeper man to ber a ni bawk.

Beiseina thamral

Kum 23 mi Trafford hi City youth academy chhuak a ni a, senior team-a hlankai a nih hnuah Accrington Stanley leh Bolton Wanderers-ah loan-a chhuakin City tan vawi khat mah a inlan lo.

Pep Guardiola hnuaia hmun a chan loh hnuah 2023 khan Burnley a pan a, Vincent Kompany hnuaiah rinrawl ni mah se Premier League-ah a inhamtanpui zo lo a, Championship lamah an tla.

Turf Moor-ah season khat dang a khelh leh hnuin nikum nipui lai khan £27mtd in Etihad Stadium-ah a kir a, Brazilian keeper Ederson a chhuah avangin 'first choice' nih a inbeisei.

Mahse beisei angin thil a kal lo. City-a zawm leh aṭanga thla hnih hnu lawkah Paris St-Germain keeper Gianluigi Donnarumma chu Pep-a'n a la lut a, Trafford-a'n rinrawl nih a beiseina a thamral zui.

England international hian season hmasa khan City tan hian vawi 17 a inlan a, Premier League-ah match li chiah khel mah se Carabao Cup leh FA Cup chawina kawngah player pawimawh a ni thung. World Cup-ah Thomas Tuchel-a'n ko mah se vawi khat mah a inlan lo.

Leeds mamawh chhanna

Trafford hi City-ah a nghet lo nia sawi a awm chhunzawm a, keeper mamawh Leeds an lo langin an dawr nghal chat. Tun nipuiah Leeds hian an keeper pahnih an chân a, Karl Darlow-a'n Manchester United a zawm bakah Illan Meslier chuan Arsenal a pan bawk.

Lucas Perri leh Alex Cairns te erawh an la awm a, mahse Perri hian season hmasa tir lam khan Darlow lakah a hmun a hloh a, kumin January 7-a Newcastle 4-3 a an hneh loh hnuah a nlan leh tawh lo bawk.

Goal vengtu an mamawh lai tak a nih avangin Whites (Leeds sawina) manager Daniel Farke chuan Trafford hi a duh a, inbiakna an neih tirh aṭangin Elland Road-ah seng luh ngei a tum a, rinrawl a nih leh theih tawh a rinawm bawk.

Engtin zel?

Leeds hian Trafford manah City hnenah £40 mtd an pe phawt dawn a, a khelh ṭhat dan a zirin £5 mtd an pek belh ang. Hei bakah hian Leeds hian an hralh leh a nih chuan, an hralhna man aṭangi City-in 20% an chang ve dawn bawk.

Trafford hi English keeper man to ber a nih bakah, Premier League chanchina keeper man to palina a ni pha bawk. Kepa Arrizabalaga (£71.6 mtd), Alisson Becker (£67 mtd) leh Andre Onana (£47.2 mtd) te chiah a tluk lo.

City keeper hlui hian Burnley top flight game 32 chauh la khel mah se theihna sang tak a nei a, Burnley tan Championship-ah match 45 aṭangin goal 16 chauh a chhuah a, Clarets coach hlui Scott Parker pawhin 'world class' tih hialin a lo fak tawh.