Scott-a'n Sixers a vau lawk

Los Angeles Lakers player hlui Byron Scott chuan LeBron James-a'n Philadelphia 76ers a zawm hnuah, beisei sang viau mah se 2000 bawr vela Lakers an hlawhtlin loh ang kha an nih theih thu a sawi a, James a awm avang ngawta champion chiang sa an nih loh thu a sawi bawk.

Kum 41 mi James-a kal lehna tur an inrinsiak luih luih hnuah thla hmasa khan Sixers a zawm a, a kum tam ve deuh tawh mah se chuai lam a la pan loh bakah, league-a player langsar sa Tyrese Maxey leh Joel Embiid te an kawl.

Hei bakah hian 2024 NBA Finals-a MVP Jaylen Brown chu Biston Celtics aṭangin an la lut a, player an neih dan aṭanga en chuan sang tak thleng tura rin an hlawh nghal, Eastern Conference-ah rorel tura beisei an ni.

Kum 64 mi Scott chuan 1980 Sixers chu player langsarte leh an theihna chu chhuang nghal vak tur an nih loh thu a sawi a, Lakers-a a hlawhchham ang kha an nih ve a hlau.

NBA title vawi thum lo la tawh Scott chuan, "2000 chho kha kan thlir let chuan, Lakers khan Karl Malone, Gary Payton, Kobe Bryant leh Shaquille O'Neal te bakah Derek Fisher an nei tel.

Player ropui tak pangain bul an ṭan nghal thei, en mai chuan mi zawng zawng khan Championship an lak ngei an ring. Mahse eng nge thleng chhunzawm kan hre vek ang.

Lakers team-ah khan Payton leh midang ṭhenkhat inkarah innghirnghona a awm a, inremna siamtu ber anga sawi Malone a inhliam bawk avangin championship an beiseina a bo. Detroit Pistons an hneh loh dan en let chuan game liah vawi khat chiah an hneh thei, chuvangin talent neih chu a ṭhat rualin nomawi chawina a ni lo," a ti.

Kum 2003 nipui laia Malone leh Payton an lak khan beisei sang vhle mah se, Malone chu khup hliam vangin a inlan tam lo a, a lo kir leh hnuah ngai a awh thei lo. Bryant leh O'Neal pawh hliamin a tlakbuak avangin an talbuai.

Hetiang thil a lo thlen tawh avangin 76ers hi mipuiin rinhlelhna nen an thlir lo thei lo a, defence leh offence-ah an indip ang em? tih leh inhliam awlsam tak Embiid chu regular takin a inkhel thei tawh ang em? tih chu zawhna tam ber a ni.

Chutihrualin Sixers hi an dam ṭhat a, inlungrualna an neih phawt chuan team hlauhawm tak an ni dawn a, Maxey-a'n season hmasaah match tinin point 28.3 leh assist 6.6 nei ang a ni. Sixers hian 2023 regular-season MVP lo ni tawh Embiid an nei a, ani hi an club ṭum hnih score tam ber ni tawhin season thar hmachhawn turin an inpeih tawh hle.