Van de Ven-a'n contract thar ziak hnai

Tottenham Hotspur defender Micky van de Ven chuan contract thar a ziak dawn a, club danga chhuak loin season tharah pawh Spurs tan khel chhunzawm zel turin thutlukna a siam niin Fabrizio Romano-a'n a tarlang.

Season hmasaah Spurs-in beisei an pha lo takzet a, 17-naah season kharin Premier League-ah an inhamtang thei hram. Roberto de Zerbi hoin indinthar hna thawh an tum a, player thar lak nan sum an sen hnem bakah club-a châm duh lote chu an chhuahtir zel.

Mimal takin Van de Ven a che chhe lo a, Spurs tan match 40 chuang a khelh bakah World Cup-ah Netherlands tan talrhnungah ban rinawm a ni. Hemi vang hian Europe-a club langsarin Dutch defender hi lak luh tumin an lo hel tawh.

Kum 25 mi Van de Ven hi hma hian a teammate Pedro Porro leh Antonin Kinsky te chuan Spurs-a châm turin inremna thuthlung an lo ziak tawh a, De Zerbi hnuaiah khel turin an inpeih.

Van de Ven pawhin contract thar a ziak dawn a, club hotute nen an inbiak hnuah a thuphungin an inrem tawh a, a contract tharh hian a hlawh pawh a pung sawt dawn.

Nikum December khan London club hian Netherlands international hi, hlawh sang zawk nen thlun ngheh an lo tum tawh a, khatih lai khan player thar lak ai pawhin Van de Ven thlun ngheh hi an ngai pawimawh zawk.

Spurs hian hian tun nipui chhung hian centre back thar pahnih an la a, Marco Senesi chu Bournemouth-a a contract a zawh hnuin free transfer-in a rawn zawm bakah, Jan Paul van Hecke chu Brighton & Hove Albion aṭangin pound maktaduai 52-in an lo la tawh bawk.

An defender Luka Vuskovic erawh £46mtd in Brighton-in an lei ve thung a, an captain Cristian Romero-a hma hun a chiang lo bawk. Hetiang a nih avang hian Italian coach De Zerbi-a'n Van de Ven hi hmun pawimawh a chantir chhunzawm a rinawm.

Dutch defender hian August 2023 khan Wolfsburg aṭangin Tottenham hi a zawm a, inelna hrang hrangah match 96 inlanin goal 10 a khung tawh. Tharum a ngah bakah a tlanchak avangin left back-ah pawh an chhawr ṭhin.