Electric Vengin Chanmari an chelh

Nimin tlai Mizoram Premier League inkhel hmuhnawm takah Electric Veng FC leh Chanmari FC te 1-1 in an inhnehtawk a, match li khelh tur la awmah team pahnihin point 15 ve ve an hmu. Electric Veng tana chanchin duhawm lo erawh MPL best defender ni lai PC Laldinpuia'n minute 86-naah red card a hmu a, Inrinni tlaia Chawnpui FC an hmachhawn hunah an chhawr thei lo ang.

Lammual inkhelah hian Chanmari FC-in Lalremruata hmangin minute 41-naah hma an hruai a, Tuikual North tlangval hian Electric Veng defender Lalmalsawma (Buangpuia) back pass sual nang fuhin a khung. Electric Veng substitute David Lalchhuanawma chuan minute 67-naah a lu hmangin siphurh a sut a, goal dang a luh belh tawh lo. 

Round 7-ah Electric Veng hian Chanmari hi hneh tawh mah se tun ṭumah erawh Chanmari hi team ṭha zawk a ni a. Remruata'n goal khat a khung nachungin goal ruaka khung loh a nei a, man of the match-a thlan David Laltlansanga'n chance ṭha a hlah ve bawk.

Inkhelh banah Electric Veng coach Lalsangzual Hmar chuan, "Chanmari hi team ṭha an ni a, point khat kan hmu hi a lawmawm. Chutihrualin kan lama goal luh dan erawh ka lawm lo a, tihsual vang a ni. Tlarhnung lamah insiamṭhat kan ngai.

"Kan team dinhmun kan hria a, kei chuan semifinal hi ka ngaihtuah ngai lo. Kan relegate ang a, ka mualpho mai ang a, tih erawh ka ngaihtuah ṭhin," tiin a sang pali zingah awm mah se semifinal a sawi ri duh lo. Chanmari coach Lalhmangaiha Sailo (Angaiha) erawhin semifinal an beisei ngei thu a sawi thung.