Bayern manager thar tur inrinsiak

Bayern Munich-in kartawp Bundesliga inkhelah Eintracht Frankfurt 5-1 in an hneh lo a, German champion-in Niko Kovac an chawlhtir nghal. Zanin dar 11:25-ah Bavarians hian manager lailawk Hansi Flick hoin Champions League-ah Olympiakos an mikhual ang.

German champion hian group B-ah point kua an hmuh tawh avangin last 16 an luh ngei a rinawm a, Bavarians hnung zui tur a la chiang lo. Zanin dar 12:30 hian Red Star Stadium-ah Tottenham Hotspurs (4 pts) leh Red Star Belgrade (3 pts) te an inkhel dawn. Spurs hian an muala 5-0 zeta an hneh theih Serbian club hi an hneh nawn thei a nih chuan knockout round a hnai sawt ang.

Ralf Rangnick, Erik ten Hag, Arsene Wenger, Massimiliano Allegri leh Jose Mourinho te chu Bayern Munich manager tura sawi rik an ni a, an hming a langsar hlawm hle. Bayern Munich president Uli Hoeness chuan, "Kan manager tur chungchang hi chu sawi a tam tawh a, tifel turin kar thum chhung hun kan nei. Kan hun neih hi ṭangkai thei ang berin kan hmang ang," tiin thutlukna an la neih loh thu a sawi.

Bavarians hian kum 54 mi Hansi Flick hoin kartawpa Borussia Dortmund an hmachhawn hunah pawh a la ho dawn a, international break-in a chhunzawm dawn. November 23-ah Fortuna Dusseldort an tlawh dawn a, Esprit Arena-ah Bayern-in manager thar an neih a rinawm.

Manchester City manager Pep Guardiola chuan, "Chawlh rih tumin thutlukna siam rih mah ila Bayern Munich sawmna chu ka hnar thei lo. Damchhungin vawi khat chauh Bayern sawmna hi thleng thei a nih avangin kal mai a ngai," tiin Bayern Munich enkawl chu hna duhawm a nih thu a sawi a, sawmna hi tu nge dawng dawn tih erawh a la chiang lo.

Kum 61 mi Rangnick hian German football-ah tawnrhiat a nei ṭha a; club tawh enkawl zingah Stuttgart, Hannover, Schalke leh RB Leipzig te an tel. Bayern-in Rangnick hi an duh berah a ngaih theih a, season liam ta pawh khan German manager chungchang hi ngaihtuah ni tawh mah se Kovac chungah rinna an nghat ta thung. Tunah erawh Rangnick hian RB Leipzig-ah season tawp thleng contract a neih avangin lakluh a awlsam dawn lo.

Arsenal manager hlui Arsene Wenger hian nal takin German ṭawng a hmang thei a, season tawp thlenga team enkawl thei dinhmunah a ding. Bayern-in Eintracht Frankfurt chauh la enkawl Kovac lakah rinna an nghat sual a, tun ṭumah hian tawnhriat nei zawk an la lut a nih pawhin a mak lo ang.

Ajax manager Erik ten Hag hian kum 2013-2015 chhung khan Bayern B team a enkawl tawh a, season liam ta khan Dutch club hi UCL semifinal a thlenpui avangin a buk a rit ve thei bawk. Chutihrualin Rangnick ang thoin tun thut thuta lak theih a ni dawn lo a, January emaw season thar lam thlir a ṭul a rinawm.

Italian manager Allegri hming pawh a ri ring a, chutihrualin German ṭawng thiam lo Carlo Ancelotti kaihhruaina hnuaiah 2016-17 season khan harsatna an tawk tawh. Juventus manager hlui Allegri tan beisei tur erawh a la awm tho, Italian manager agent Giovanni Branchini hi Bayern nena inhre ṭha tak an ni.

Manchester United manager hlui Jose Mourinho an sawi ri tel a, amah pawhin a hreh lo an ti. Amaherawhchu, club president-in Bayern-a awm turin a duh lo tiha sawi a awm, Uli Hoeness hian November 15-ah president hna hi chawlhsan dawn mah se thutluknaah erawh a la inrawlh a rinawm.