LBS Suzuki Avenis CYMA Volleyball : Vawiinah quarterfinal khelh a ni dawn

LBS Suzuki Avenis 24th Inter Branch YMA Volleyball Tournament 2026-ah team riat chiah an dam tawh a, team pariat la damte chu Muanna Veng, Tachhip, Ngopa Hmar Veng, Khawbel, Khawhai, Nursery, Hunthar leh Maubawk te an ni.

Vawiin chawhma dar 10:00 aṭangin R. Dengṭhuama Stadium, Mualpuiah quarterfinal khelh ṭan a ni dawn. A hmuna inkhel en man hi Rs 20 chauh a ni a, LPS10 bakah YouTube channel CYMA, MVA leh HD Sports aṭangin a thlawnin a en theih bawk.

Aizawl leh Aizawl pawn

Central YMA Volleyball-ah hian champion lai chu Muanna Veng an ni a, Aizawl pawn team champion hnuhnun ber chu kum 2004 daih tawh kha a ni. Champhai Vengthlangin final-ah Hunthar hnehin an champion.

Chutihrualin volleyball inelna hi Aizawl pawnah an uar a, inkhelh thiam pawn an ṭhahnem. Kumin CYMA Volleyball round of 16 lut zingah pawh Aizawl pawn an tam zawk a, team pakua lai an awm. Chungte chu Ngopa Hmar Veng, Khawhai, Tachhip, Khawbel , Lungdai, Bungtlang Chhim Veng, Dengsur, Hmunṭha leh Sihphir te an ni.

Aizawl lam aṭang team pasarih Muanna Veng, Hunthar, Nursery, Maubawk, Electric Veng, Dinthar leh Kulikawn West te an tel ve bawk. Quarterfinal-ah erawh Aizawl leh Aizawl pawn team awm zat an intluk ta chiah a, Aizawl pawnah nomawi an hawn dawn em, tih hi zawhna awm chu a ni thei ang.

Engtin zel?

Ngopa Hmar Veng leh Khawbel te an inhmachhawn dawn avangin Aizawl pawn aṭangin semifinal lut tur an awm chiang a, chutiang bawkin Hunthar leh Maubawk te an inkhelh dawn avangin Aizawl lam pawhin semifinal-ah team an thawh chiang bawk.

Inkhel hmasa ber tur Muanna Veng leh Tachhipah champion lai buk a rit zawk a, Khawhai leh Nursery te inkhel turah Khawhai buk a rit zawk thei ang. Team pariat chiah an dam tawh avangin team ṭha vek an ni tawh a, eng result pawh thleng thei vek a ni.