Semifinal luh tum PUC

MFA Independence Day Women's Football Tournament 2026 chu vawiinah khelh chhunzawm leh a ni dawn a, To Be United leh Pachhunga University College te dar 11:00-ah an inhmachhawn dawn. Chawhnu dar 1:30-ah Govt. Aizawl College leh Tlangvaltea Women's FC te an inkhel chhunzawm dawn bawk.

Hmeichhe inelnaah hian team ruk an tel a, group pahnihah inṭhenin group A-ah MFA Starlight, To Be United leh PUC te an awm a, group B-ah Ramhlun Womens FC, GAC leh Tlangvaltea Women's FC te an awm. Group khat aṭangin pahnih ve vein semifinal an lut ang.

Group A-ah MFA Starlight leh PUC te vawi khat ve ve hnehna chang tawhin, point thum ve ve an hmu a, goal difference-ah an ṭhat zawk avangin Starlight-in pakhatna dinhmun an luah.

To Be United erawh chak an la neih loh avangin pathumnaah an awm a, match khat chiah la khel mah se goal nga zet an chhuah tawh avangin an tan semifinal khel tura tlin a har tawh dawn.

Group B-ah erawh match hnih khel awmchhun Ramhlun Women's FC chuan chak an nei lo a, group-a an awmpui Tlangvaltea Women's FC leh GAC ten an hneh ve ve. GAC leh Tlangvaltea Women's FC ten semifinal an luh tawh avangin vawiinah pawh hahdam zawkin an inhmachhawn a rinawm.