United leh PSG an inhnehtawk

Inrinni zan khan Manchester United leh Paris Saint-Germain ten Ullevi Stadium, Gothenburg-ah friendly match an khel a, 1-1 in an inhnehtawk. European champion hian Ibrahim Mbaye hmangin minute hnihna lekah goal an khung a, Bryan Mbeumo hmangin English club-in an chhanglet.

Luis Enrique hote hian Spanish second division club Mallorca lakah 3-0 in tlawm mah se Manchester United lakah erawh an insiam ṭha a, ball chang tam zawk niin 59% ball an chang. PSG-in player ṭha an la chhawr tam lo nachungin season tharah pawh Europe team ṭha zinga mi an ni leh dawn.

Michael Carrick-a tan pawh lawmna tur a awm thei ang. Second half-ah captain Bruno Fernandes leh player thar Youri Tielemans te an rawn lut a, Belgium captain Tielemans-a'n thil langsar tak tih nei lo mah se team tana ṭangkai thei tur a ni tih a pholang.

Chutihrualin Benjamin Sesko thachhang dawl turin Joshua Zirkzee rin ngam a la har a, Man United tan nipui bazar hman ṭhat a la ṭul. Midfield lamah pawh friendly match-a che ṭha Mason Mount hliam vanga lakchhuah a ngaih avangin mual laia khel thei tur player an zawn chhunzawm a rinawm.

Man United hian Real Madrid midfielder Aurélien Tchouaméni an la beisei a, Manu Kone leh Angelo Stiller te an la ngaihven bawk. English club hian Sweden aṭangin Republic of Ireland khawpui Dublin an pan a, Leeds United nen August 12, Nilaini zan dar 12:00-ah friendly match an khel leh ang.

Leeds United an hmachhawn hunah hian Manchester United pawh an kim tawh dawn a, Marcus Rashford bakah Kobbie Mainoo leh Lisandro Martinez ten an zawm ang. Carrick chuan Rashford nen chanchin an nei a, Man United tana a khelh hmasak bera an khelh dun thu a sawi a, English forward hi chawrchhuahna club tan hmun pawimawh a chang leh thei ang.