Jaissle hnuaiah Newcastle chak nghal

Newcastle United chuan manager thar Matthias Jaissle hnuaia an match hmasa ber khelin, Inrinni zan khan Valencia chu an mual Estadio de Mestalla-ah 2-1 in an hneh a, German manager hnuaia an match hmasa bera an chak avangin an phur sawt ang.

Magpies hian goal an chhuah hmasa zawk a, minute lina lekah Filip Ugrinic-a'n hmahruaina goal a khung. Mahse bench aṭanga luhtir Yoane Wissa-a'n 52-na leh minute 76-naah goal khungin a team a chakpui.

Hnehna chang mah se Jaissle a la ṭawng fimkhur a, a lawmawm rualin tih tur an la ngah thu a sawi. Kum 38 mi manager chuan, "Hnehna chan hian inrintawkna kan neih phah ṭhin a, club boruak ṭhat lai ber a nih loh avangin kan chak kha a lawmawm hle. Player tinte an khel ṭha vek a, khatianga an khelh ṭhat reng pawh ka beisei.

Chutihrualin kan chak avanga ngaihṭha taka awm thei kan la ni lo a, tih tur kan la ngah hle. Hna kan la ṭan dawn chauh avangin thil a awlsam dawn lo a, inelna sang leh hautak ber pawl Premier League kan la khel dawn bawk avangin kan thawhrim lehzual a ngai," a ti.

Jaissle-a hnuaiah keeper thar Lukáš Horníček-a'n bul a ṭan nghal a, Czech Republic international hi season tharah Magpies 'first choice' a nih a rinawm. Ani bakah hian Bazoumana Toure chu second half-ah a lut bawk a, goal khung lo mah se a khel chhe lo.

Hetihlai hian Anthony Elanga chu hliam vanga zawm chhuah a ni a, Valencia defender Jose Gaya chuan hlauhawm takin a ngalah a tlawh thlu a, Spanish defender hi hnawhchhuah a ni zui. Kum 24 mi Elanga hliam hi endik a ni leh dawn a, a chawlh chen tur a la hriat loh.

Newcastle hian August 12, Nilaini zan dar 9:45 hian Everton nen Scottish Gas Murrayfield Stadium-ah an inhmachhawn leh nghal dawn a, Scotland panin an chhuak leh nghal.