Arsenal-ah Guimaraes a chiang ta

Premier League champion Arsenal chuan Newcastle United captain Bruno Guimaraes an la lut ta a, Brazilian midfielder hi a tirah pound maktaduai 70-in dawr mah se, an inremna tak chu £75mtd a ni ta.

Kum 28 mi midfielder hian Emirates Stadium-ah kum li khel turin contract a ziak a, a ṭul dan a zira thla 12 dang pawhsei theihna dan an ziak tel bawk.

Brazil international chuan, "Ka tana Newcastle an hlutzia ka hria a, chhuahsan pawh harsa ka ti hle. Mahse, tawnhriat thar tawn ka duh a, kei leh ka chhungte tana chona thar hmachhawn ka duh a ni," a ti.

Hetihlai hian Newcastle pawhin an Captain kal chhuak ta chu duhsakna an hlan - Guimaraes hian Newcastle hi January 2022 khan zawmin, khatihlai khan relegation hlauhthawnawma an awm lai a ni.

Mahse, head coach chhuak ta Eddie Howe kaihhruaina hnuaiah Magpies chu Premier League team hmuhnawm pawlah an chhuah a, kum 2025 khan hun rei tak hnua an major trophy hmasa ber lakpuiin, League Cup-ah a champion pui.

Kum 2023 leh 2025 khan Magpies chu Champions League khel turin a tlinpui bawk a, hna a thawk ṭha hle. Mahse, tunah chuan chona thar hmachhawn turin St James' Park a chhuahsan ta.

Guimaraes chuan, "Chona thar hmachhawn duhnain min hneh a, nomawi chawi ka duh a ni. Thawnthu thar ziah ka duh a, chutiang tih theihna hmunah chuan ka kalin ka inhre bawk - bul ṭan ka châk tawh hle," a ti.

Brazil tana World Cup khela fehchhuak Guimaraes hian chawlh a hman zawh hnuah Magpies squad a zawm leh phawt a, mahse, kar hmasa khan Spain-a an training-na hmun chhuahsanin, mittui nen club staff leh a ṭhiante a thlah.

Guimaraes chuan Arsenal a zawm dawn hian, Gunners player-in an biak nual thu sawiin, ram tana a khelhpui Gabriel leh khelmuala buaina a lo neihpui tawh Declan Rice te pawhin an biak thu a sawi.

Brazilian midfielder chuan, "Rice pawhin message min thawn a, 'Kan club-ah lo kal rawh, ṭhian kan nih tawh avangin kan intibuai tawh lo ang' a ti," a ti a, Rice nena an boruak ṭhat thu a sawi nghal.