Milan lakah Chelsea chak chiang

Xabi Alonso hoa indinthar tum mek Chelsea chuan Inrinni zan khan Jakarta, Indonesia-a pre-season inkhelah AC Milan chu 3-0 in an hneh a, Joao Pedro-a'n goal hnih khungin Moises Caicedo-a'n goal khat a thawh ve bawk a, Milan-in a chhanletna tur an nei ve lo.

Blues hian a tir aṭangin an thunun tluan a, first half hun pek belhah Brazilian forward Pedro-a'n corner aṭangin an hmahruaina goal a tauh lut a, kum 24 mi forward hian second half an ṭan chiah tihah hnai tak aṭangin an goal hnihna a khung leh nghal.

Chelsea an phur laklawh a, minute li hnu lawkah Romeo Lavia corner pet chu box pawna vengtu nei lo Caicedo-a'n mawi zetin goal kilah tak a pet lut a, an chak nemngehna goal a ni zui.

Tottenham Hotspur leh Juventus laka an tlawm zawn avangin, manager thar Alonso hnuaiah Chelsea hi chu rinhlelhna nena thlir a ni hman a, Mahse Ruben Amorim-a enkawl AC Milan lakah chungnung taka hnehna an chan avangin an inringtawk leh sawt ang.

London club hian nizan khan Malaysia champion Johor Darul Ta'zim nen an inhmachhawnin a, an result kan hre hman lo. Season ṭan hmaa an friendly match hnuhnung ber chu Real Sociedad nen August 15, Inrinni tlaiah an khel dawn bawk a, August 24 Pathianni zanah Alonso hoa Premier League match hmasa ber atan Fulham an hmachhawn ang.