Australian Open Federer-a'n match point pasarih a patlang

Roger Federer chu amah aia kum 10-a naupang Tennys Sandgren-a'n set ngana hruai thlengin American player hian match point vawi sarih zet nei mah se Swiss star hian hnehna a chang. Grand slam vawi 20-a champion tawh Federer hi kum 38 mi a nih tawh avangin Australian Open semifinal a thlen dan hian fak a hlawh hle.

Nimin quarterfinal inkhel dangah Novak Djokovic chuan harsatna hranpa nei loin Milos Raonic chu 6-4, 6-3, 7-6 (7-1) in a hneh. Tennis player ropui pahnih Federer leh Djokovic te hian January 30, Ninganiah final  khel tur an zawng ang.

Kumin Australian Open-ah hian Roger Federer hi seeded number 3 a ni a, a khingpui Sandgren hi world number 100-na chauh a ni. An ranking thlirin Swiss star hi awlsam taka chak tur ni mah se a khelhfuh loh 

ṭum a tawng a, third set laiin ṭhal nat vangin 'medical timeout' a la bawk.

Federer hi chak lo thei dinhmunah a ding a, unseeded player Sandgren-a'n match point vawi sarih zet a nei a. Rod Laver Arena-a entu 15,000 ten Swiss star chak lo tura an ngaih hnuah Federer rawn tho chhuakin 6-3 2-6 2-6 7-6 (10-8) 6-3 in hnehna a chang.

Mipuiin darkar thum leh minute 28 chhung inkhel chu hmuhnawm an ti a, Australian Open vawi ruk champion tawh hi standing ovation an pe hial. Federer chuan, "A chang chuan kan thuhnuaiah engmah a awm tawh lo a, vanneihna neih a ṭul tawh ṭhin. Chak ka phu lo a, chutichung chuan nomawi ka la beisei ve zel avangin ka lawm takzet," tiin a vannei tih a zep lo.

Seeded number 2 Novak Djokovic-a'n tun inelna a khel ṭha tluang a, match hmasa bera Jan-Lennard Struff laka set khat a hloh hnuah set khatmah a hloh tawh lo.

Nimin quarterfinal-ah pawh hian Serbian star hian awlsam takin set hmasa pahnih 6-4 leh 6-3 in a la nghal. Set thumnaah seeded number 32 Raonic rawn che ṭhain Djokovic-a'n harsatna tawk ve deuh mah se tie break-ah 7-1 in an chak.

Kum 32 mi Djokovic hian grand slam vawi 16 a la tawh a, Federer record khum turin a dinhmun a ṭha. Kumin Australian Open-ah hian vawi 19 grand slam champion tawh Rafael Nadal a khel ṭha tluang bawk a, Spanish star leh Djokovic hi final-a intawng tura ngaih ni mah se Federer hian mipui a barakhaih nawn thei bawk. Vawiin chawhma dar 9:00 hian Australian Open quarterfinal khelh chhunzawm tur a ni a, Stan Wawrinka leh Alexander Zverev te an inkhel dawn. Tlai dar 2:00-ah seeded number 1 Rafael Nadal leh Dominic Thiem te an inkhel leh ang.