PSG leh Real an inlan dawn

Champions League group ngaihven hlawh group A-ah Paris Saint-Germain leh Real Madrid chu zanin hian an inlan dawn a, club lian pahnih dinhmun erawh a in ang lo. 

PSG hian zanin dar 1:30-ah Club Brugge an mikhual dawn a, dar 1:30-ah vek Real Madrid chuan Galatasaray an mikhual dawn bawk. French club hian hnehna an chan chuan last 16 an lut chiang tawh dawn a, Real tan him turin chak ngei ngei a ṭul thung - match thumah point li chiah an la nei. 

PSG-in an league match hnuhnung berah rin loh takin Dijon chu 2-1 in an ngam lo a, table-ah hma an hruai fal avangin hlauhthawnawm dinhmunah erawh an ding lo. Chutihrual chuan he result hian PSG mikhual tur Club Brugge tan thu lawmawm a thlen a, chu chu 'French club hi hneh theih an ni' tih hi a ni - Belgian club-in chak an tum dawn. 

Club Brugge hian khualmualah Real Madrid chu 2-2 in an lo inhnehtawkpui tawh a, Paris khaw club tan ngaihthah ngawt chi an ni lo tihna a ni. Beisei loh result min pe turin theihna an nei. 

PSG hian khualmualah Club Brugge hi 5-0 ngawtin an lo sawp tawh a, mahni mualah lehnghal chuan an zuam ang, tih a chiang reng. Mahse, French club-in hnehna an chan khan Neymar a tel lo tih loh chu player ṭha an inlan kim deuh vek a, zaninah erawh chutiang a ni dawn lo. Hei tak hi Brugge tan remchanga lak theih tur a ni. 

Midfielder pahnih Ander Herrera leh Marco Verratti inlan theih a la beiseiawm loh a, defender pahnih Thomas Meunier leh Thilo Kehrer dinhmun a la chiang lo bawk. 

Zinedine Zidane enkawlna hnuaiah Real Madrid-in French manager enkawlna hnuaia Madrid hmasa zawk kha an ang tawh lo a, league leh Champions League-ah beisei an phak lo ve ve!

Kartawp La Liga inkhelah pawh Barcelona tlawm vanga hmahruaina hun ṭha an nei chungin an khingpui an lo inhnehtawkpui ve ngawt a, hun ṭha bawhpelh leh Real a inhmeh rih riau. Santiago Bernabeu-a Galatasaray an mikhual tur pawh hi Real tan chuan insiamṭhatna hun ṭha a ni a, mahse PSG laka 3-0 a an mualpho hnua Brugge (2-2) a inhnehtawkpuitu team hi an tho leh thei ang em? Zaninah a chhanna pek kan ni dawn. 

Madrid khaw club tan Gareth Bale leh James Rodriguez ten training ṭan leh tawh mah se club tana inlan tur khawpin an la fit tawk lo a, zaninah Galatasaray an hmachhawn thei lo ang. 

Turkish club tan tawnhriat nei ṭha Radamel Falcao chu a la inhliam avangin inkhel boruak sangah a inlan thei dawn lo a, Galatasaray tan channa a tling. Tawnhriat nei ṭha Steven N'Zonzi, Jean Michael Seri leh Ryan Babel te hi Real tana harsatna thlen thei tur an ni a, an intawn hmasaka 1-0 a an ngam loh team hi hneh let an chak ang.