A chung berah Barty a awm tlang

Hmeichhe tennis thuneitu sang Women's Tennis Association (WTA) chuan tun season chhunga a hnuhnung ber atan world ranking a ti chhuak a, Australian nula Ashleigh Barty chuan a chung bera awm chungin season a khar.

Kum 23 mi Barty hian September thla aṭang khan a chung ber hi a luah leh tawh a, inelna hnuhnung WTA Finals-ah a champion a, tun dinhmunah point 7,851 neiin amah hnaih bertu Karolina Pliskova aiin point 2000 deuhthawin a sang fal zawk.

Japanese nula Naomi Osaka chuan season chawhnu lama che fuh tawk lo Simona Halep kal khumin pathumna dinhmun a luah a, Grand Slam vawi 23 champion tawh Serena Williams chu a sang zual 10 zingah a tel phak chiah.

Grand Slam vawi thum champion tawh leh world number 1 hlui ni bawk Angelique Kerber erawh a ropui lo. German nula hian season duhawm lo a hmang a, point 2,175 hmuin a sang 20 zingah a lang phak hram. Ranking sang nei chunga season khar theih hi player tin duhthusam a ni, kumina an ranking hian season thara tournament an khelh tura seeding chungchangah nasa takin kawngro a su thei dawn a ni.