LBS Suzuki Avenis CYMA mipa volleyball semifinal Muanna Veng vs Khawbel; Nursery vs Hunthar

LBS Suzuki Avenis 24th Inter Branch YMA Volleyball Tournament 2026-ah team pali chauh an dam ta a, Mizoram pum huap inelnaa volleyball khel thiam palite chu Muanna Veng, Hunthar, Khawbel leh Nursery te an ni.

Mipa semifinal hi vawiin hian R. Dengṭhuama Stadium, Mualpuiah hmeichhe semifinal zawhah khelh a ni dawn. Champion lai Muanna Veng leh Khawbel te an inkhel ang a, semifinal hnuhnung zawkah Nursery leh Hunthar te an inkhel zui ang.

Quarterfinal hmuhnawm

Champion lai Muanna Veng an ṭha a, mah se Tachhip hneh turin vanneihna an mamawh. Sadraka te tawnhriat neih ṭhat zarah Muanna Veng hian 23-25, 25-23, 20-25, 25-22, 15-13 in hnehna an chang hram a, a vannei zawk an ni.

Khawbel leh Ngopa Hmar Veng te pawh an intluk tawk a, a tawpah tawnhriat ngah zawk Khawbel 26-24, 28-26, 23-25, 25-16 an vannei ta zawk. Hnehna an chan theih nan Lalremfela a che ṭha hle.

Khawhaiiin ṭum dang an pha lo a, setter an neih ṭhat tawk loh an tuar. Nursery-in inkhel an thunun a, Lalvenpuia an chhawr theih tawh bawk avangin harsatna nei loin Khawhai chu 25-18, 25-18, 25-19 in an hneh.

Huntharin team ṭha zia an chhuah a, PVL player mai ni loin PVL club an neih rah an seng. Quarterfinal hnuhnung berah Maubawk ṭang thei viau mah se Huntharin an phu angin straight set-in hnehna an chang.

En châkawm semifinal

Team ṭha pali chauh an dam tawh a, inelna buatsaihtu CYMA leh MVA lamin chhunlama inelna an chhunzawm dawn avangin R. Dengṭhuama Stadium a la khat zo lo ang. Chutihrualin volleyball tuite tan erawh hmaih phal chi a ni tawh lo.

Muanna Veng hian kum riat chhungin vawi thum champion an tum dawn a, mah se Valbuanga an kawl tawh lo tih hriat a ṭha. An khingpui tur Khawbel hian inelna hnuhnung berah quarterfinal thleng mah se Hunthar an hneh lo a, kuminah erawh nomawi chawi ngei an tum dawn.

Huntharin niminah anmahni ang bawka vawi thum champion tawh Maubawk an hneh a, kumina an champion leh chuan champion ngun ber an ni dawn. An khingpui tur Nursery hi CYMA Volleyball-ah final la thleng ngai lo ni mah se volleyball thiam veng an ni a, Khawhai an hneh thlirin zuam ngawt chi an ni lo ang.