Rozama kaihhruai MLS-in Police an pet tla

I Day Football 2026-ah Lawngtlai club MLS FC-in Mizoram Police 3-1 a hnehin semifinal an lut. Coach Lalrozama Fanai enkawl MLS hian group stage-ah Aizawl FC an chelh tawh a, Police an hneh leh avangin an vannei satliah lo tih chiang hle. MLS hian semifinal-ah Kanan FC an hmachhawn dawn a, final luhna kawng a inhawng zau.

Nimin inkhelah hian MLS tan K. Lalhmangaihkima'n goal hnih a khung hnuah Police tan Lalbiaktluanga'n khung ve mah se Lawngtlai club tan Felix Lalruatsanga'n chak nemnghehna goal a khung.

RG Stadium-a inkhelah hian MLS an chungnung hret a, tun inelnaa che ṭha Hmangaihkima'n minute 19-na lekah Police offside trap bumin goal hmahruai a khung. Second half-ah Police an vannei zui a, Hmangaihkima freekick satliah chu keeper Buanga'n man pialin goal-ah a lut.

Keiṭum tlangval Tluanga'n minute 57-naah Police tan siphurh a sut ṭhen a, hemi hnu hian ruahsur nasat vangin inkhel an chawl. Ruahsur han hnuah MLS zawkin goal an khung belh a, Serchhip tlangval Felix-a'n goal ropui a khung. Felix hian Aizawl FC chhuahsanin MLS a zawm a, Lawngtlai club-in an ṭhatpui hle.