NBA-ah Simmons a lo kir dawn?

Kum khat chuang zet club nei loa a awm hnuah Ben Simmons chu NBA-a kir leh a rilruk a, khawvela basketball inelna sang ber let leh tur hian a inbuatsaih mek niin NBA journalist Marc J. Spears chuan a tarlang.

Spears chuan, "Simmons-a'n lo kir leh a tum hnu hian team engemaw zatin an ngaihven a, Western Conference team pakhat chuan an training camp zawm turin a bik takin an sawm," tiin X-ah (Twiter) a ziak.

NBA team eng emaw zat chuan Simmons-a hi an dawr tawh a, ani pawhin 2028 Olympics-ah an ram tan khelh a châk avangin contract an ziah theih hniam ber pawh ziah a hnial tawh lo niin khawthlang chanchinbuten an sawi.

Australian point guard Simmons hian season hmasa khan club nei loin a hmang tluan a, All Star-ah pawh an lo thlan tawh hian basketball chawlhsan a, a inkhelh zinkawng tihtawp a tum hman hial thu a lo sawi tawh.

Kum 2016-a Philadelphia 76ers-in an draft hnuah Simmons hi NBA-a rawlthar hmuhnawm ber pawl a ni a, 'Rookie of the Year' pawh a lo dawng tawh. Mahse beisei a phâ lo zui a, Brooklyn Nets leh Los Angeles Clippers-ah te insawn leh mah se ngai a awh leh tawh lo.

A inkhelh hnuhnun ber chu nikum April daih tawh kha a ni a, season khat chhung inkhel loin a awm tawh. Inkhel loin awm rei tawh mah se club tam takin Simmons an iai lo a, a lo khelh tawhna Sixers bakah champion lai New York Knicks leh Boston Celtics te pawhin an ngaihven nia sawi a tam hle.