Cincinnati Open-ah Sinner tel dawn lo

World number one Jannik Sinner chu tunkara khelh tur Cincinnati Open aṭangin inhliam vangin a inhnukdawk a, tun thla tawpa khelh tur US Open-ah erawh a inlan theih beisei a ni.

Kum 24 mi Sinner hian thla liam ta khan Wimbledon final-ah Alexander Zverev hnehin Grand Slam-a ha vawi nga nan a champion a, mah se hemi hnu hian court-ah a inlan leh tawh lo.

Italian tennis player Sinner chuan, "Ka doctor leh ka team-te nena kan inrawn hnuah Cincinnati-a Masters 1000 tournament aṭanga inhnukdawk turin thutlukna kan siam. Ka khup dinglamin harsatna min la siam a, medical team nen theihtawp chhuah mah ila inelna hmachhawn thei ka la ni lo," tiin a sawi a, nakkum lamah Cincinnati Open -a tel ngei a tum thu a sawi bawk.

Cincinnati Open hi August 13, Ningani aṭangin khelh ṭan a ni dawn a, final hi August 23, Pathianniah khelh ṭan a ni ang. Zverev leh Grand Slam vawi 24 champion tawh Novak Djokovic ten inelna hi an hmachhawn dawn.

Nikum khan kum 23 mi Carlos Alcaraz chuan final-ah Sinner hi a hmachhawn a, 5-0 a hma a hruai laiin Italian player Sinner hi damlohna avangin a khel zo thei lo. Champion lai Alcaraz pawhin banrek hliam vangin inelna hi a hmachhawn thei dawn lo.