Villa-in Endrick an duh

Premier League club Aston Villa chuan Real Madrid forward Endrick chu lak an duh a, mahse Villa hian Brazilian forward hi a nghet ni loin, season tluan atan loan-a lak an duh.

Kum 20 mi Endrick hian Real-ah khelhna hmun a chang meuh lo a, season hmasa chawhnu lamah khan French club Olympique Lyon-ah loan-in a khel. Ligue 1 club tan match 21 inlan hmanin goal riat leh assist pariat a nei a, a khelh ṭhat avangin Carlo Ancelotti-a'n World Cup khel turin a ko.

Kuminah Los Blancos hi an pu hlui Jose Mourinho-a'n a enkawl tawh dawn a, tlarhma lamah Kylian Mbappe a awm miau avangin Endrick tan rinrawl nih inbeisei chi a la ni lo.

Villa an lo lang a, Champions League khel tur an nih avangin an squad tihchhah nan Endrick an duh. Villa hian tlarhma lamah Ollie Watkins leh Tammy Abraham te an kawl a, mahse Jadon Sancho a chhuah bakah Leon Bailey chu hliamin a tlakbuak avangin, Endrick an la thei a nih chuan a sirah an chhawr a rinawm.

Chutihrualin Endrick hi a la naupang a, theihna sang tak a neih avangin Real pawhin a ngheta chhuahtir an phal lo. Lyon-a an kaltir pawh khan Brazilian rawlthar hi khel tam se an duh avangin, an inremnaah match nga a start tlin apiangin an hawhna man aṭangin €200,000 an paih zel.

Unai Emery-a'n tun nipuiah player pali a la lut tawh a, midfielder Johan Manzambi, Modou Kéba Cissé leh Joao Gomes te lak nan pound maktaduai 100 a hmang tling ṭep tawh a, Chelsea aṭangin winger Alejandro Garnacho chu loan-in a lo la tawh bawk.