A chung berah Nadal a awm

Thawhṭanni zan khan Association of Tennis Professionals (ATP) chuan world ranking thar a ti chhuak a, a chung berah Rafael Nadal a awm - pakhatna nilai Novak Djokovic chu pahnihnaah a awm thung.

Serbian tlangval Djokovic-a'n Paris Masters title a la zo chiah a, he inelnaah hian Nadal chu hliam vangin semifinal-ah a inhnukdawk thung. Djokovic hi chungnung chhunzawm tur niin a lang, mahse season hmasa lama point a hmuh ṭhatna tournament ṭhenkhatah a inlan lo a, ranking point a neih sa paihsak a nih avangin a hnungtawlh.

Grand Slam vawi 19 champion tawh Nadal hi world number 1 a nih hnuhnung ber chu November 4, 2018 daih tawh kha a ni a, tuna a chung bera a awm vang hian a dinhmun a ṭha nghal vek tihna erawh a la ni bik chuang lo.

Kum 22 mi chauh niin 2008 August thla khan a vawi khat nan number 1 hi a lo ni tawh a, a chung berah hian chawlhkar 197 chhung a awm tawh. Ani aia record nei ṭha chu Roger Federer (310 weeks), Pete Sampras (286), Djokovic (275), Ivan Lendl (270) leh Jimmy Connors (268) te an ni.

A thiam zual pariat inelna ATP Tour Finals an la hmabak. O2 Arena, London-a an chet dan a zirin Nadal nge Djokovic zawk hi world number 1 ni chunga season khar tur chu a la hriat chauh ang, a hmawr bawk fuh a ngai dawn tihna a ni.

Tun season bikah chuan Nadal leh Djokovic te hi player cheṭha pahnih an ni. Nadal-a'n French Open leh US Open nomawi a chawi a, Djokovic hian Wimbledon leh Australian Open lamah hlawhtlinna a chang thung - Grand Slam pali awm chu an insem.