Semifinal-ah goal kua khungtu PUC

MFA Independence Day Women's Football Tournament 2026 chu nimin khan khelh chhunzawm niin, Pachhunga University College chuan 9-0 in To Be United an sawp a, Group A hmahruaitu ni chungin semifinal an lut.

PUC tan PC Lalduhthlani chuan goal ruka khung a, Esther Lalnunpuii'n goal hnih khungin Grace Lalrampari'n goal khat a thawh ve bawk. To Be United erawhin goal an khung ve thei lo a, group stage-ah chak an neih loh avangin an tla.

Inkhel dangah Government Aizawl College chuan 3-2 in Tlangvaltea Women's FC an hneh a, team pahnihte hi semifinal lut chiang tawh mah se inkhel boruak a ṭan loh phah lo.

GAC tan Lalrinmuani'n goal hnih a khung bakah C. Zairemmawii'n goal khat a khung bawk a, Tlangvaltea WFC tan Lalrintluangi leh Lalhmangaihzuali ten goal khung mah se an si phurh an sut zo thei lo a, a tlawm zawkah an ṭang.

Semifinal hi naktuk hian Chite Veng Playground-ah khelh a ni leh nghal dawn a, Group A pakhatna PUC leh Group B pahnihna Tlangvaltea Women's FC te an inhmachhawn ang a, Group B pakhatna GAC leh Group A pahnihna MFA Starlight ten final luh an inchuh ve bawk ang.