Mario a lungawi thei lo

Brescia striker Mario Balotelli chuan Pathianni zan Serie A inkhela vun rawng vanga amah hmusittute a chhanglet a, "Ngaihtuahna mawl leh te tak te in nei a ni," a ti a, a dim duh lo. 

Hellas Verona laka 2-1 a an tlawmna inkhelah Balotelli hi a vun rawng vangin hmusit taka deusawh a ni a, Manchester City striker hlui hian hei hi hrethiam loin mipui hawi zawngin ball a pet a, khelmual a chhuahsan hial. 

Mahse, a ṭhianten an thlem lungawi hnuah Mario hi khelmualah a lut leh a, goal a khung zui - a team erawh hnehna a chanpui zo chuang lo. Italian striker chuan, "Football nena inkaihhnawihna nei miah lo thil an lantir a, rilru zim tak putute khan nangni aia ropui leh thawnthu tam tak nei thilah in ring in rawlh a ni," tiin an sawi. 

Verona Ultras hotupa Luca Castellini chuan, "Balotelli hi Italian a nihna chhan chu khua leh tui nihna a neih vang a ni mai a, Italian tak erawh a ni ngai lo ang," tiin a sawi a, hei hi Balotelli hian a chhanglet zui a ni. Italy tan vawi 36 inlana Euro 2012 final lo hruai thleng tawhtu striker chuan, "Mario-a'n Italy tana goal a khung chuan - ka ti leh ngei bawk ang tih ka tiam bawk che a, in lawm ṭhin a ni lawmni kha?" tiin zawhna a pe zui a, a lungawi 

thei lo.