Manchester City tan inbuatsaihna hun ṭha?

Zaninah Champions League inkhel a awm leh dawn a, Mizote ngaihven Premier League club zingah Manchester City chuan dar 1:30 hian Atalanta an lenchilh dawn. 

Citizens hian kartawp Premier League-ah Liverpool an hmachhawn zui dawn avangin Italian club nena an inkhel tur hi an tan chuan 'inbuatsaihna' game tia sawi theih a ni a, chak a pawimawh. Group C inkhel dangah Dinamo Zagreb chuan zanin dar 1:30 hian Shakhtar Donetsk an mikhual dawn a, team pahnih hi match thum khelha point li ve ve nei tawh an nih avangin inkhel boruak a sang ang. 

Manchester City-in ṭum dang ang bawkin league-ah nomawi an beisei a, Champions League match thum an khelh tawhah point kua an nei bawk. 

Zanina an lenchilh tur Atalanta hi Etihad Stadium-a 5-1 a an lo sawp tawh kha an ni bawk a, Manchester khaw club hian khualmualah inthlahrun an tum lo ang. Zawhna awm chu Pep hian engtiangin nge squad a remkhawm ang? tih hi a ni a, Atalanta hneh hi last 16 luhchianna a nih dawn si avangin City manager tan ngaihthah ngawt a thiang lo. 

Pep chuan, "Atalanta lakah kan ṭhat dan berin kan khel ang," a ti a, chumi awmzia chu Atalanta nena an intawn hmasaka hattrick siamtu Raheem Sterling leh goal hnih khungtu Sergio Aguero ten bul an ṭan a beiseiawm tihna a ni. 

Premier League-ah point rukin Liverpool an sang fal a, kartawp inkhel hi City tan an inkar sawr zimna remchang a ni - mahse City an vanduai. Liverpool-in nizanah Champions League an khel tawh a, Anfield-ah a ni bawk. City erawh Italy-ah zin a ṭul a, zaninah an inlan dawn chauh avangin Reds aiin hahdamna hun an nei tlem tihna a ni nghal bawk. 

Pep chuan, "Anfield kal tura inbuatsaih dan ṭha ber chu Atalanta laka ṭha taka khelh hi a ni," a ti a, mood fuh tak nena Liverpool khelmuala lenluh a duh. Mahse, Atalanta hian City laka an mualpho hnu lawk khan Udinese chu 7-1 in an sawp a, goal khung an thiam ve tho tih an pholang - City tan chetsual palh thei a ni tih theihnghilh loh a ṭha ang.