Tuin nge Messi leh Ronaldo hnung zui ang?
Lionel Messi leh Cristiano Ronaldo te hi tunlai football khawvelah chuan player dangte thik phak loha 'ṭha bik' an ni a, anni pahnih hian tun hnai kum 10 chhung vel chu mimal chawimawina sang zawng zawng pawh an hui vek deuhthaw a ni; thiam leh hlawhtlin vanga dawng an nih avangin a mak lo.
Argentina leh Portugal captain te hi an sulhnu leh khelmuala an chet dan thlir chuan chawimawina an dawng hnem hi a awm hle, chutihrualin tunah chuan player an nih laia an hun hnuhnung lam tawng mek an ni - an chawlh hunah tu hi nge football khawvelin 'Super Star' a neih zui ang tih chu zawhna lian tak a ni.
Kylian Mbappe
(Paris St-Germain & France)
Date of birth: 20 December 1998
Position: Forward
Mbappe hi kum 21 mi chauh a la ni a, heti chung chian France chu World Cup-ah a champion pui der tawh. AS Monaco tana Ligue 1 nomawi a chawi hnuah Paris St-Germain tan an rama nomawi chawi theih ho chu a chawi kim.
Tlarhma player-in goal khung tura a mamawh ang chu a nei vek, a che rangin a tlan chak em em bawk. Real Madrid nen sawizawm a hlawh hle, hlawhtlinna lian leh ropui zawk a duh a nih chuan atan Spain khawpui pan a fuh mai thei.
Joao Felix
(Atletico Madrid & Portugal)
Date of birth: 10 November 1999
Position: Forward
Nikum July thla khan Atletico Madrid chuan hmatawng hriam tak, hmabak nei eng bawk si an zawng - a chhanna chu pound maktaduai 113 man Joao Felix a ni. Benfica chhulchhuak hi South American player anga ball thiam a ni.
Portugal tana a khelhpui Ronaldo angin tunah chuan a la hlawhtling rih lo a ni mai thei. Atletico manager Diego Simeone erawh chuan a player hi tlarhma lamah a duh anga che turin zalenna a pe ngam tawh.
Jadon Sancho
(Borussia Dortmund & England)
Date of birth: 25 March 2000
Position: Winger
Jadon Sancho hming inzawh nawn a ngai lo. Manchester City tan khelphak tura a la naupan laiin inkhelh a duh tawh si a, beiseina nen Borussia Dortmund a pan. German club tan hian goal khung bakah assist a nei thei hle - a thiamna hmangin kum 19 lekah khawvel hriata lar a
ni der tawh.
Season hmasa ṭha takin a hmang a, kuminah a thiam dan ngaiin a khel zui leh bawk. A theihna leh thiamna en chuan sang tak thleng thei tur a ni, hlawhtling lehzual tur chuan tharum a neih tam zual hret a ngai ang - England tan match 11 a khel der tawh tih hriat tel a fuh ang.
Ansu Fati (Barcelona
& Spain U21)
Date of birth: 31 October 2002
Position: Winger
Barcelona hian engtik niah emaw chuan Messi tel loa an khelh a la ngai dawn tih an hria, Argentine forward hmunruak luah thei tur an zawng kual nual tawh - an duhthusam an hmu thei rih lo; tuna an beiseina neih mek chu kum 17 mi Ansu hi a ni.
Catalan club tana goal khung thei naupang ber hi a tlan chak a, a che rangin ball a thiam em em bawk. Player dang ang lo taka an fak zualna chu game a thlir thiamin striker ṭha tak ang maiin goal hmaah a hriam - Champions League lamah pawh Barca tana inlan thei naupang ber a ni bawk.
Trent Alexander-Arnold
(Liverpool & England)
Date of birth: 7 October 1998
Position: Right-back
Football-ah chuan 'goal' a pawimawh a, mipui lam hmuh duh ber pawh a goal lai a ni ṭhin. Tlarhma lam player an langsar
ṭhin a, a hnunglam tan lansarhna kawng a zim deuha ngaih a ni. Mahse, tunlai a kum rualpui zinga mi hriat hlawh chu Liverpool defender Trent Alexander-Arnold hi a ni.
Arnold hian Reds tan Champions League nomawi a chawi tawh, hlawhtlinna an chan theih nana player pawimawh a ni. Premier League champion mai thei dinhmunah an ding mek bawk a, kum 21 chauh la ni mah se goal venhim bakah a nawr lamah a thawhhlawk avangin a ṭangkaina a thuahhnih hle.
Kai Havertz
(Bayer Leverkusen & Germany)
Date of birth: 11 June 1999
Position: Midfielder
Kum 20 mi lek ni chungin Kai Havertz hian Germany football inelna sang ber Bundesliga match 100 chuang a khel der tawh a, a record en hian player danglam leh thiam bik a nihna chu inhrilh nawn a ngai kher awm lo e.
Leverkusen midfielder hi a palian
ṭha a, a fingin ball a hum thei hle - an fak zualna tak erawh ball sem a thiamin player dangte tana lak nuam taka a pass thiam hi a ni. German player ṭha bik zinga mi a ni tih lantir nan chuan Bayern Munich lamin an buaipui nih phawt a pawimawh ang.
Phil Foden
(Manchester City & England U21)
Date of birth: 28 May 2000
Position: Midfield
A pumrua a lian lo a, tharum a ngah loh bakah a kum a la naupang bawk. Mahse, Manchester City manager Pep Guardiola chuan Foden hi midfield laia a duh anga che turin a ringtawk a, a theihna a hmuh chian avangin khawvel player hmabak nei eng ber zingah a ngai.
Kum 19 mi hian Premier League match 28 a khel tawh, a club khelhna hi Man City - English club zinga player nei ṭha leh squad chhah an ni tih hriat tel a ṭul. Tun ang zela hma a sawn a nih chuan khawvel midfielder hmuhnawm bik zingah a tel theih a rinawm.
Rodrygo
(Real Madrid & Brazil)
Date of birth: 9 January 2001
Position: Winger
Real Madrid tan Rodrygo-a'n reserve team lamah match khat chauh a khel hman a, manager Zinedine Zidane chuan senior team tana khel tlakah ngaiin a ko nghal! Nikum September thla khan a match hmasa ber khelin Osasuna lakah khelmual a luh aṭanga second 94 hnu lekah goal a khung nghal.
Ke ding lam leh vei lam hmang thiam Rodrygo hi La Liga bakah Champions League lamah pawh a tlangnel. Galatasaray nen an intawn ṭumin hattrick a siam der tawh, mi zakzum leh inkiltawih ṭhin tak ni mah se khelmual chhungah erawh naupang kawlhrawng a ni thung.