East Bengal an vannei

Zirtawpni zan Indian Super League inkhelah East Bengal an vannei a, Kerala Blasters lakah an tlawm dawn nia a lan hnuah hun pek belha Scott Neville-a goal hmangin South Indian club hi 1-1 in an inhnehtawkpui. 

Blasters tan Jordan Murray chuan minute 64-naah inkhela goal awmchhun a khung a, Kibu Vicuna nau ten an chakpui mai dawn niin a lang hman - mahse, hun pek belh minute nganaah defender Neville a inlar a, Bright Enobakhare corner aṭanga ball kal chu a tauh lut. 

Kerala tan goal dang khung lehna hun a awm tawh lo a, 1-1 in team pahnih an inhnehtawk. Match hnuhnung bera red card a hmuh avangin Lalruatthara chu Blasters tan a inlan thei lo a, midfielder K. Lalṭhathanga chu minute 62-naah bench aṭanga luhtir a ni thung. 

Bethlehem Vengthlang tlangval Puitea hian freekick aṭangin Rohit Kumar tan hun ṭha siamsak mah se Delhi tlangval hian goal-ah a chantir thei lo. 

Inrinni zan ISL inkhelah pawh chak zawk an awm lo a, Mumbai City FC leh Hyderabad FC chu 0-0 in an inhnehtawk. 

Inkhel Result

SC East Bengal    1 - 1    Kerala Blasters

SCE: Scott Neville 90+5'

KEB: Jordan Murray 64'

Mumbai City    0 - 0    Hyderabad FC

Zanin Inkhel Tur

Chennaiyin FC    7:30 PM    East Bengal