Leicester champion beiseina a nung

Brendan Rodgers-a enkawl Leicester City-in ngaihthah mai mai chi an ni lo tih pholangin Southampton chu 2-0 in an hneh a, Premier League nomawi an beiseina chu an chhi nung ve zel.

Foxes tan hian James Maddison chuan angle chep tak kar aṭangin minute 37-naah goal hmahruai a khung a, hun pek belh minute nganaah Harvey Barnes chuan a khung ve leh bawk. 

Leicester hian hnehna an chan avangin league table-ah pahnihna an ni leh ta a, mahse, nizana Manchester United leh Liverpool inkhel result a zirin an dinhmun erawh danglam leh thei a ni. 

Saints tan striker chhuanvawr Danny Ings chu Covid-19 kai vangin a inlan thei lo a, Leicester tan chuan English striker inlan thei lo hi vanneihnaa chhiar tel loh a mawi lo. 

King Power Stadium-a inkhelah Foxes-in vanneihna an keng tel a, club lian huang chhunga dah ngam khawpa squad chhah chu ni se an vanneih dan hi 'champion zia' tia sawi chi a ni. 

Saints tan hian Ryan Bertrand leh Will Smallbone-te chuan hun ṭha nei mah se Foxes keeper Kasper Schmeichel an paltlang thei lo a,  Stuart Armstrong chuan crossbar a tih per bawk. 

Leicester hi vannei hlawm tawpa sawi erawh a rem bik lo - chak an phu zawk avangin point thum an hlawh chhuak a, goal hnih an khung bakah hian chance ṭha dang pawh an nei. 

Saints centre back Jan Bednarek chuan Barnes-a goal khung tur nia lang chu goalline aṭangin a lo tauh chhuak hman a, Alex McCarthy chuan Barnes leh Jamie Vardy shot ṭha tak chu a dang bawk. 

Leicester boss Brendan Rodgers chuan, "Team ṭha tak lakah hnehna kan chang a ni. Bul ṭantirah kan inthlahdah deuh hlek a, social distancing kan ngai thutak mah mah em aw, tih tur khawpin kan khingpui team kha kan hnaih hleithei lo. 

"Mahse, a hnuah kan attack a, goal ṭha tak kan hlawh chhuak ta a ni," tiin a sawi a, second half-ah an khelh ṭhat zawk thu a sawi bawk. 

Southampton boss Ralph Hasenhuttl chuan, "Tlawm zawk nih hi thil nuam a ni ngai lo a, mahse, chance erawh kan nei a ni. Bar kan tih per a, kan theihna zawng zawng kan hlan bawk. 

"Awlsam taka tlawm ṭhin team kan ni lo a, mahse, zaninah erawh a thiam zawkin hnehna an chang a ni. Maddison-a goal-te kha a mawi em em a, ni tinin khatiang kha khung theih a ni lo. Chance kan nei a, kan khung thei lo thung - chu chu kan danglamna a ni," tiin a sawi.