Chelsea - Eng vangin nge kum upa an melh?

Premier League club hlun Chelsea-in an coach atan Xabi Alonso an la lut a, an phur hle. Blues-in coach an thlak a, an thlak loh erawh ṭum dang ang thoin player an lei nasa!

Blues neitu Blueco hian Chelsea neitu an nih hnu hian bazar hi nuam an ti ber ni maiin a lang a, tu pa emaw bill la hlim ang deuh an ni - tun nipuiah pawh player 10 an la lut leh der tawh.

Chelsea hian nimin khan Spanish left back Pep Chavarria an lakluh thu an puang leh tawh a, kum 28 mi hi Rayo Vallecano aṭangin pound maktaduai 16.3-in an lei - a khelh ṭhat dan a zirin £1.7mtd an pek belh ang.

Kum 28 mi full back hian kum 2031 thleng Stamford Bridge-a cham turin contract a ziak a, "London-a club ṭha ber a ni," tiin Chelsea a sawi zui a, Premier League champion Arsenal tan ngaihthlak a nuam dawn lo.

A aiah B

Chelsea hian Blueco hnuaia an kalphung hmasaah chuan, player, kum naupang zawk an la lut ṭhin a, kum rei tak atan contract an ziahpui tlangpui - hralh leh tur hisapa lak pawh an ngah a, club chu sumdawn nan an hmang tel a ni ber.

Mahse, Chelsea hian player naupang rual neih chu an hlawhtlinpui lutuk lo. Khelmualah an talbuai fo a, an chak ngei tawh tura ngaihna inkhelah si phurh an suttir fo a, ṭul loa card chawi lah an ngah!

April thla khan Chelsea neitu zinga mi Behdad Eghbali chuan Blues-ah an kalphung an thlak tur thu a sawi a, "Plan mumal tak kan nei a, chu chu kan thlirlet. Kan ruahman anga thil a kal lo a nih chuan kan ruahmanna chu kan siamrem mai tur a ni a, hmasawnna tur kan nei nual.

"Hmasawn kan mamawh a, chumi tur chuan Chelsea tana inlan nghal thei tur, insiamrem chawp ngai lo pawh kan mamawh tel ve bawk. A pawimawh ber chu kan tihsual aṭanga insiam ṭhat a ni a, hma kan sawn theih nan kan kalphung pawh kan her danglam hret ang," a ti.

Rosenior kha

Chelsea fan-ten Liam Rosenior kha an ngai lo viau ang, tih a chiang a, mahse, kha coach khan Blues a enkawl tirha a hmuh hmasak ber chu an puitling tawk lo tih kha a ni.

Rosenior khan Chelsea player hmaa thu a sawi hmasak berah, Blues player-te chu an rilru puitlin tawk lohna a hrilh! Rosenior hian, "Match ṭha tak in khel a, mahse, in duh dan ni loa thil a thlenin in hnual nghal vek zel - chu chu kan siam ṭhat a ngai," a ti.

Mahse, Rosenior-a beiseina chu engmah lo maiah a chang a, Champions League last 16 first leg-a Paris Saint-Germain an ngam lohte khan, minute 74-naa keeper Filip Jorgensen-a chetsual avangin an hnual nghal vek a, inkhel pahnih belhkhawmah 8-2 in an tlawm.

Blues player zinga hruaitu ni tura beisei Enzo Fernandez leh Moises Caicedo te pawhin hruaitu nih an tlin lo a, an ṭhiante beng daih a ṭul hunah a pawr ber berah an ṭang a, an talbuai tlat zel!

London Upa Pawl!

Alonso-a'n Chelsea talbuaina a hmu a, Blues enkawl tura an indawrnaah pawh player puitlin tawk lohna hi sawi lan a ni. Alonso hian, "Rilru paukhauh leh huaisen, midang kaihruai thei kan belh a ngai a ni," a ti a, inkhelh thiam chauh ni loin hruaitu ṭha a melh tel.

Real Madrid boss hlui hian Bayer Leverkusen-a a player hlui, Sunderland tana khel Granit Xhaka chu ngaihven nghal mah se, Black Cats-in hralh an phal lo a, a hnuah Liverpool captain hlui Jordan Henderson leh Brighton & Hove Albion striker Danny Welbeck lam a hawi.

Henderson hi kum 36 mi ni tawh mah se, a rilru paukhauhna, midang fuih phur a thiamnate chu a larpui a ni a, mawi taka football phochhuaktu ni lo mah se, a chhehvela player-te inrintawkna pe thei khawpa hruaitu ṭha a ni.

Welbeck pawh kum 35 mi ni tawh mah se, midang fuih phur thiam leh team boruak tinungtu tia sawi ṭhin a ni a, season hman zawh takah goal 14 lai a la khung bawk avangin Chelsea-in an mamawh chhanna an hmuah an inngai.

A dang pawh

Chelsea player lakluh zingah Maxence Lacroix pawh kum 26 mi a ni tawh a, Crystal Palace tana khel a nih avangin EPL-ah tawnhriat a nei ṭha sa bawk - lak thar Chavarria pawh kum 28 mi a ni tawh.

Alonso chuan, "Team hi a in balance a ngai a, player ṭhenkhat chu kum 20 an ni ang a, kum 30 te pawh an ni ang. Career hmang ṭantir leh, a tawp hnaih tawhte awm khawm se, chu chu team-in a mamawh a ni," a ti.

Hetihrual hian Chelsea hian an player pawimawh zingah Marc Cucurella an chhuahtir a, Real Madrdid a zawm. Andrey Santos pawhin Manchester United a pan a, Tyrique George (Everton) leh Trevoh Chalobah (Como) te pawh club thar panin an chhuak.

Blues hian player lakluh an neih nual rualin, inṭhuahfai tumin hma an la mek bawk a, player 10 vel chu Blues hian an chhuahtir a la ngai mai thei!

A chhuak lam!

Blues hian an player zingah Axel Disasi, Benoit Badiashile leh Marc Guiu te chu ruahmanna tharah an tel loh thu an hrilh tawh a, transfer bazar inkhar hma ngeia an chhuah a rinawm - Asia lama pre-season tour-ah pawh hruai an ni lo.

Striker pahnih Liam Delap leh Nicolas Jackson te pawh chhuah phalsak an ni a, mahse, a man an beisei zat aṭanga tehin an chhuak lawk lo mai thei. Delap tan £50mtd an beisei laiin, Jackson hi £65mtd-a hralh theih an inbeisei.

Real nena sawizawm hlawh hman Enzo Fernandez chu Manchester City-in an ngaihven mek a, £120mtd-a an ngam a nih chuan London club hian kaltir mai an pawi ti lo ang. Blues hian Malo Gusto pawh chhuah an phal a, mahse, £75mtd-a lei duh ang awm ang em, tih chu zawhna a ni.

Pedro Neto hi Maresca-a'n Etihad Stadium lamah seng luh a tum nia sawi a awm a, a tlawm lo ang. Blues hian Disasi leh Guiu man atan £25mtd an beisei a, Badiashile pawh an ruahmannaah tel lo mah se, £30mtd an la chhiar.