Tlai dar 2-ah Aizawl FC Vs Chanmari FC

Aizawl FC leh Chanmari FC a nih tawh chuan ṭha ber nih inchuh a ni tawh a, friendly match pawh ni se, boruak a sang ṭhin. Vawiin tlai dar 2:00-a an inkhelhna tur erawh I Day Football semifinal a ni dawn a, boruak a sang dawn. MPL ṭantirh aṭangin Aizawl FC leh Chanmari FC hian boruak an nei ṭan a, kum 14 hnuah pawh tualchhung boruak chhem alhtu an la ni reng.

Semifinal maw?

MPL12 final-ah Chanmari FC-in Aizawl FC an hneh a, dream final a nih ang ngeiin inkhel pawimawh a hmuhnawm hle. Indian Football League khel thei club pahnih an nih avangin final-a inhmachhawn atan an itawm a, mahse an intawnna tur erawh semifinal a thung.

Aizawl FC-in match hmasa berah MLS FC lakah point khat hmu hram mah se an group-ah pakhatna an ni tho a, Chanmari erawhin Dinthar FC an hneh loh avangin pahnihnaah an awm. Rochhingpuia hote chetsual vangin final ni loin semifinal-ah an inhmachhawn a ṭul phah.

R-a vs Chhinga

Mizoram football-ah coach ṭha bik an chhuak ṭhin a, Santosh Trophy-a Mizoram champion puitu H. Vanlalthlanga'n coaching hna a chawlhsan tawh. National Games-a Mizoram gold medal lakpuitu K. Malsawmkima'n team langsar a enkawl rih tawh lo. Chutihrualin MPL-a champion hnem ber Lalsangzuala Hmar bakah Police Meet leh MPL-a Mizoram Police champion puitu Lalbiaksanga Colney te hming lam hmaih pawh a thiang lo ang.

Hetiang coach ṭha karah hian coach chhuak thar Rochhingpuia leh R. Lalruatfela te an rawn chhuak a, hmabak an nei êng ve ve. Chhinga hi MPL-a sulhnu nei ṭha ber zinga mi a ni a, Chanmari fapa rangkachak hi Chanmari FC hian a jersey no. hak ṭhin no. 8 pawh player dang hak theih tawh loh turin an dah ṭha hial. Coaching lamah pawh Chhinga hian Chanmari FC hi MPL leh I Day Football-ah a champion pui bawk.

R-a erawh player angin sulhnu nei lo mah se kum 30 pawh tling loin Aizawl FC a enkawl thei a, AFC A licence a neih bakah D Licence instructor a ni a, Kolasib tlangval hian football a tuichilh bawk avangin a ngaihtuah angin a naute a khelhtir thei fo bawk. A tawi zawngin tualchhung football-a coach ṭha ber nih tum pahnih an inhmachhawn dawn a, hei ringawt pawh hi en châkawm a tling.

A ṭha rual leh awmze nei

Chanmari FC thawm a lian zawk a, nipui bazarah pawh an che chak zawk. Chanmarians hian tualchhung player ṭha an lalut thei zel a, Inter Village Football-a Sihphir Venghlun champion puitu Malsawmtluanga Pautu pawh an la nghal. Season liam taa MLS defender F. Lalchhanchhuaha leh Aizawl FC defender hlui HK Lalhruaitluanga te an ni a, team tan chakpui tham an ni hlawm.

Hetah hian tawp mai lo a, Jerry Mawihmingthanga leh Paul Ramfangzauva ten an la ho bawk a, an squad a chhah ṭha hle. Chanmari hian Aizawl FC aiin player an nei ṭhaah a ngaih theih a, Chhinga hote hi champion nawn thei tur an ni.

Aizawl FC erawh kalphung nghet an nei a, hei vang hian an squad pawh a nghet ṭha hle. R-a hoin khelh dan nghet an nei a, goal khung thei bik striker Zomuansanga bakah Vincent Lalduhawma, Sawma Tlangte leh Laltlanzova te an neih avangin an goal bawh a na. Tun nipui bazarah Chanmari FC duh loh goalkeeper RS Lallawmzuala an la lut a, CYMA Football 2025 best keeper hi an ṭhatpui viau bawk.